18 jyl buryn joǵalǵan túrkistandyq áıel Qulsary qalasynan tabyldy

Túrkistan oblysynan 18 jyl buryn habar-osharsyz ketken áıel Atyraý oblysynan tabyldy. Onyń jaqynda Jylyoı aýdanynyń ortalyǵy – Qulsary qalasyna kelgeni anyqtaldy, dep habarlaıdy Kazinform.

Atyraý oblystyq polıtsııa departamenti baspasóz qyzmetiniń málimetinshe, 34 jastaǵy áıelge 2005 jyly izdeý salynǵan. Ol sol jyly anasymen renjisip, úıinen ketip qalǵan.

Sodan beri otbasymen, týystarymen baılanysqa shyqpaǵan. Elimizdiń birneshe qalasynda, onyń ishinde Almaty men Shymkentte turǵan. Túrli mekemede tazalyqshy bolyp jumys istegen.

Alaıda, onyń jeke basyn kýálandyratyn qujaty joq. Sol sebepten, polıtsııa qyzmetkerleriniń baqylaýyna alynǵan.

«Túrkistan oblysynan 18 jyl buryn habar-osharsyz ketken áıeldiń jaqynda Qulsary qalasyna kelgeni anyqtaldy. Onyń tabylǵany týraly Túrkistan oblystyq polıtsııa departamentine habarlandy. Tabylǵan áıel týystarymen, onyń ishinde anasymen telefon arqyly baılanysqa shyǵyp, sóılesti. Endi ony týystaryna jiberý úshin tıisti is-shara qabyldandy. Oǵan quqyqtyq keńes berildi», - dep habarlady departamenttiń baspasóz qyzmeti.

Eske sala ketelik, budan buryn Atyraýda joǵalǵan 20 jastaǵy boıjetken úsh kúnnen keıin ıesiz saraıdan tabylǵanyn habarlaǵan edik.