18 jastaǵy qostanaılyq qyzdyń ólimi: sot úkimi qatańdatyldy
QOSTANAI. QazAqparat - Qostanaı oblysynyń sotynda Darıa Mahartovanyń ólimine qatysty sot otyrysy ótti, dep habarlaıdy QazAqparat tilshisi sot zalynan.
Kóz jumǵan qyzdyń anasy sottalǵandarǵa qatysty sot úkimine appelıatsııalyq shaǵym túsirgen bolatyn. Ol sottan qyzyn óltirgen Rýslan Ajanov pen Anatolıı Shevchenkony ómir boıy bas bostandyǵynan aıyrý týraly úkim shyǵarýdy suraǵan.
«Sot alqasy Ajanov pen Shevchenkonyń jazasyn qatańdatty. Olar jaza merziminiń alǵashqy 5 jylyn Arqalyq túrmesindegi tolyq oqshaýlaǵyshta ótkizedi. 5 jyldan keıin olar jazasyn qaýipsizdigi eń joǵary mekemede óteıdi. R.Ajanovtyń appelıatsııalyq shaǵymy qarastyrylmady», - delingen oblystyq baspasóz habarlamasynda.
Eske salsaq, Qostanaı aýdanynyń Zatobol aýylynda joǵalyp ketken 18 jastaǵy Darıa Mahartovanyń denesi orman alqabynan tabyldy. Ol 20 shilde kúni saǵat 22.00 shamasynda úıinen shyǵyp, qaıta oralmaǵan.
Osy jyldyń aqpan aıynda Qostanaı oblysynyń qylmystyq ister jónindegi mamandandyrylǵan aýdanaralyq sotynda Darıa Mahartovanyń ólimine qatysty sot úkimi shyqty. Rýslan Ajanov 23 jylǵa, al Anatolıı Shevchenko 25 jylǵa bas bostandyǵynan aıyrylǵan edi.
