18 jastaǵy qostanaılyq qyzdyń ólimi: sot úkim shyǵardy
QOSTANAI. QazAqparat - Qostanaı oblysynyń qylmystyq ister jónindegi mamandandyrylǵan aýdanaralyq sotynda Darıa Mahartovanyń ólimine qatysty sot otyrysy ótti, dep habarlaıdy QazAqparat tilshisi sot zalynan.
«Sot úkimimen Rýslan Ajanovqa qaýipsizdigi eń joǵary túzetý mekemesinde 23 jyl bas bostandyǵynan aıyrý jazasy taǵaıyndaldy. Anatolıı Shevchenkoǵa qaýipsizdigi eń joǵary túzetý mekemesinde 25 jyl bas bostandyǵynan aıyrý jazasy taǵaıyndaldy», - dep úkimdi oqydy sot tóreshisi Janar Tileýbaeva.
Sot úkimi boıynsha, sottalǵandar qaza bolǵan boıjetkenniń anasyna 4 mln teńge kóleminde moraldyq shyǵyn tóleýi tıis. Sonymen qatar sottalýshylar bas bostandyǵynan aıyrý oryndarynda psıhıatrdan májbúrlep emdeý sharalarynan ótedi. Buǵan qosa R. Ajanovqa alkogolızmnen májbúrlep emdeý taǵaıyndaldy.
Eske salsaq, 2018 jylǵy 20 shildede 18 jastaǵy Darıa Mahartova úıinen shyǵyp, qaıtyp oralmaǵan.
Keıin onyń denesi Qostanaı qalasynyń irgesindegi orman alqabynan tabyldy. QR QK-niń 99-baby (adam óltirý) boıynsha sotqa deıingi tergep-tekserý amaldary bastaldy.
