18 jastaǵy qostanaılyq qyzdyń ólimi: polıtseıler qamaýǵa alyndy
QOSTANAI. QazAqparat - 18 jastaǵy Darıa Mahartova qaza tapqan kúni polıtsııaǵa qońyraý shalyp, shaqyrtý kezinde durys jaýap qatpaǵan Qostanaıdyń eki polıtseıi tutqynǵa alyndy. Qostanaı oblysy ІІD atalmysh faktini rastady jáne osyǵan oraı túsindirdi, dep habarlaıdy QazAqparat tilshisi.
Jergilikti polıtsııa qyzmetiniń starshınasy jáne aǵa serjanty ustalyp, ýaqytsha tergeý oqshaýlaǵyshyna qamalǵan.
«20 shildede 22 :16-da qalanyń Іshki ister basqarmasynyń Jedel basqarý ortalyǵynyń «102» operatorynan Qostanaı-Zatobol jolynda belgisiz er adamnyń áıelge zorlyq kórsetip jatqany týraly habar túsken. Oqıǵa ornyna kelgen polıtseıler jolǵa jaqyn aǵash otyrǵyzylǵan aýmaqty jiti qaramaǵan. Keıin belgili bolǵandaı, zardap shekken qyzdyń denesi dál sol mańda jatqan. Osylaısha, ІІD-niń Jeke qaýipsizdik basqarmasy polıtsııa qyzmetkerleriniń mindetterin oryndaý kezinde nemquraılyq tanytqanyn anyqtap otyr», - dedi ІІD ókili.
Іshki ister departamenti Jeke qaýipsizdik basqarmasynyń tergeýshisi polıtseılerdi qamaýǵa alý týraly ótinish bildirgen soń sot qoldaý kórsetti.
Polıtseılerdiń isine qatysty QR QK 371-baby («Nemquraılylyq») boıynsha sotqa deıingi tergeý amaldary júrgizilip jatyr.
Eske salaıyq, 18 jastaǵy Darıa Mahartova 20 shilde kúni saǵat 22.00 shamasynda úıinen shyǵyp, qaıtyp oralmaǵan. Іz-túzsiz joǵalyp ketken Zatobol aýyly turǵynynyń denesi Qostanaı qalasynyń irgesindegi orman alqabynan tabyldy. QR QK-niń 99-baby (adam óltirý) boıynsha sotqa deıingi tergep-tekserý amaldary bastaldy. Jedel izdestirý sharalary júrgizilip jatyr. Keıinirek polıtseıler kúdiktiniń fotorobotyn jasap shyǵardy.
