18 jastaǵy Qaraǵandy turǵyny velosıped urlaý úshin astanaǵa kelip-ketip júrgen
NUR-SULTAN. QazAqparat – Qaraǵandy qalasynyń turǵyny elordaǵa kelip, bir aıdyń ishinde 19 velosıped urlaǵan, dep habarlaıdy QazAqparat tilshisi elordalyq polıtsııa departamentiniń baspasóz qyzmetine silteme jasap.
«Kúdikti bir aıdyń ishinde 19 velosıped urlaǵan. Jedel-izdestirý sharasy barysynda Esil aýdanynyń polıtseıleri turǵylyqty jeri boıynsha Qaraǵandy qalasynyń azamatyn ustady. 18 jasar qaraǵandylyq elordaǵa birneshe kelip velosıped urlaǵany anyqtaldy. Ol negizinen jataqhanalar men oıyn klýbtarynda turǵan. Jas jigit turǵyn úılerdiń kireberisindegi jáne arnaıy turaqtardaǵy velosıpedterdi qoldy etken. Urlanǵan velosıpedterdi kezdeısoq jandarǵa naryqtan tómen baǵamen satqan», - delingen polıtsııa departamentiniń baspasóz qyzmeti taratqan aqparatta.
Habarlamada aıtylǵandaı, tártip saqshylary ustalǵan azamattan urlanǵan 7 velosıpedti tárkiledi.
«Kúdikti óz kinásin moıyndady. Qazir atalǵan fakti boıynsha QR QK 188-babynyń 2-tarmaǵyna sáıkes sotqa deıingi tergeý amaldary júrip jatyr. Sonymen qatar polıtsııa qyzmetkerleri qalǵan velosıpedterdi izdep jatyr», - deıdi vedomstvodan.
Osyǵan oraı qalalyq polıtsııa departamenti velosıped urlyǵy onyń ıeleriniń uqypsyzdyǵynan bolatyndyǵyn atap, jeke múlikti qaraýsyz qaldyrmaýdy eskertedi.
