18 jastaǵy kanadalyq oqýshy lotoreıadan 36 mln AQSh dollaryn utyp aldy
ASTANA. QazAqparat – 18 jastaǵy kanadalyq Djýlıett Lamýr birinshi talpynystan 48 mln Kanada dollary (35,8 mln AQSh dollary) kóleminde djekpot utyp alyp, lotoreıa tarıhyndaǵy eń jas jeńimpaz atandy, dep habarlaıdy QazAqparat BBC-ge silteme jasap.
Kanada baspasóziniń jazýynsha, qyzǵa ákesi lotoreıa bıletin toltyrýǵa keńes bergen. Utysqa ıe bolǵanyn estigen sátte birden ákesinen súıinshi suraǵan.
«Qatty jyladym. Qýanǵannan jyladym, árıne. Áli kúnge deıin sene alar emespin, ómirimdegi alǵashqy lotoreıadan djekpot utyp aldym», - dedi Djýlıett jýrnalısterge.
Onyń aıtýynsha, bılet toltyrǵanyn umytyp ketken. Keıin jańalyqtardan 7 qańtarda ótken oıynda Ontarıo shtatynda, onyń týǵan qalasynda bireýdiń júlde utqanyn oqyǵan.
Jumysta otyryp, lotoreıa uıaly qosymshasyna kirgende ekrannan «Jeńimpaz» degen jazýdy kórgen. Áriptesteri de qýanyshtan aıqaılaǵan, dep eske alady boıjetken.
Djýlıett aqshasynyń bir bóligin bilimine jumsap, dáriger bolǵysy keledi. Ol árqashan medıtsınalyq bilim alýdy armandaǵan, biraq oǵan grant nemese aqsha kerek bolǵan.
Qazirgi ýaqytta ol óz qalasynda qalyp, qoǵam úshin eńbek etpek.
Aqshasynyń bir bóligin mektepti bitirgen soń (Kanadada 17-18 jasqa deıin oqıdy) demalýǵa jumsaıdy.
«Mektepti bitirgen soń otbasymyzben kez kelgen qurlyqty tańdap, ony zertteýge baramyz. Ártúrli elderge baryp, onyń tarıhymen jáne mádenıetimen tanysyp, tamaǵynan dám tatyp, tilin tyńdaǵymyz keledi», - dep bólisti Djýlıett Lamýr armanymen.
«Aqsha adamnyń jeke basyn kórsetpeıdi, seni ómirde nemen aınalysatynyń aıqyndaıdy», - dep esepteıdi ol.
Foto: ONTARIO LOTTERY AND GAMING CORPORATION
