18 jastaǵy 14,5 myń qaraǵandylyq daýys berý quqyǵyna ıe
Búgin 920,4 myń saılaýshy ózderiniń konstıtýtsııalyq quqyǵyn júzege asyra alady, onyń ishinde 14 583-i 18 jastaǵy azamattar.
Múmkindigi shekteýli jandarǵa jaǵdaı jasalǵan. Olar saılaý ýchaskesine kelý úshin ınvataksı qyzmetin paıdalana alady.
Alǵashqylardyń biri bolyp Qaraǵandydaǵy Kenshiler mádenıet saraıynda ornalasqan №17 saılaý ýchaskesine densaýlyq saqtaý qyzmetkeri Nazar Tnimov keldi.
«Meniń oıymsha, daýys berý – árbir azamattyń boryshy. «Adamdar óz taǵdyryn ózderi tańdaýy tıis» degen jalpyálemdik tájirıbeni kórip otyrmyz. Ýchaskede uıymdastyrý deńgeıi jaqsy. Barlyǵy orynsha, sanıtarlyq qaýipsizdik talaptary saqtalǵan», - dep atap ótti ol.
Saılaý ýchaskeleri karantındik talaptardy eskere otyryp daıyndalǵan. Mindetti túrde maskalar, qolǵaptar jáne antıseptıkter paıdalanylady. Daýys berý pýnkteriniń kireberisinde kilem joldarynyń ornyna dezınfektsııalyq kilemsheler tóseldi. Áleýmettik qashyqtyqty saqtaý úshin edenge belgiler syzylǵan.
Kireberiste medıtsına qyzmetkerleri men eriktiler daýys berýshilerdiń temperatýrasyn ólsheıdi. Eger ol joǵary bolyp tursa, ol azamat dáriger qaraýy úshin nemese jedel járdemniń kelýin kútý úshin bólek bólmege oqshaýlandyrylady. Jazbasha ótinish boıynsha saılaý komıssııasynyń músheleri ol jerge tasymaldanatyn jáshikti jetkizedi.
Daýys berý bólmeleri belgilengen merzimde jeldetilip otyrady. Sondaı-aq sanıtarlyq óńdeý qarastyrylǵan.
Aıta keteıik, oblystaǵy úsh aımaq epıdqadaǵalaý boıynsha «sary aımaqqa» kirdi. Bul Shahtınsk, Abaı jáne Osakarov aýdandary. Munda saılaý komıssııalarynyń barlyq músheleri, senimdi tulǵalar men saılaýshylar PTR-testileýden ótti. Eldi meken turǵyndaryna PTR testileý tegin jasaldy.
