18 jastaǵy qazaqstandyq boıjetken Ýels hanshaıymy Dıananyń marapatyn ıelendi
LONDON. KAZINFORM – 18 jastaǵy Dıana Mýrzaǵalıeva erekshe áleýmettik kúsh-jigeri úshin Ýels hanshaıymy Dıananyń atyndaǵy marapatqa ıe boldy.
Ýels hanshaıymy Dıanany eske alý úshin taǵaıyndalǵan bul marapat onymen attas qaıyrymdylyq qorynyń atynan beriledi. Oǵan hanshaıymnyń eki uly, Joǵary Koroldik Mártebeli Ýels hanzadasy jáne hanzada Garrı, Sasseks gertsogy demeýshilik tanytady.
Dıana Mýrzaǵalıeva sóıleý qabiletiniń buzylýyna jáne densaýlyǵyna baılanysty qıyndyqtarǵa tap bolǵandarǵa qoldaý kórsetip keledi. Semeı polıgonynda ondaǵan jyldar boıy júrgizilgen ıadrolyq synaqtardyń saldarynan dızartrııa dertine shaldyqqan Dıana birneshe ret ota jasatyp, talaı synaq pen qıyndyqqa qarsy túrǵan. Bala kezinde sóıleı almaǵan ol óz oıyn jazý arqyly jetkizip, keıinnen múmkindigi shekteýli balalardyń armandary týraly áńgime qurastyrǵan. Osy oqıǵalar onyń «Úmit árdaıym janymyzda» anımatsııalyq fılmine negiz boldy.
Inklıýzıvti Akademııanyń negizin qalaǵan jáne sóıleý qabileti buzylǵan adamdarǵa arnalǵan jasandy ıntellektpen jumys isteıtin SPEAKUP qoldanbasyn jasaǵan ol bilim, tehnologııa jáne áńgimeleý arqyly jahandyq ınklıýzııaǵa jańa dem bergen.
«Dıana» marapatynyń bas dırektory, doktor Tessı Odjo CBE Dıana Mýrzaǵalıevany marapatymen quttyqtady.
– Biz ýaqytyn oń ózgerister jasaýǵa arnaǵan dúnıe júzindegi Dıana marapatynyń jańa jeńimpazdaryn shyn júrekten quttyqtaımyz. Biz bul marapatty jeńip alǵan adamdardyń jastardy qaýymdastyqtarǵa qatysýǵa shabyttandyratynyn bilemiz, - dedi ol.
Dıana marapaty kimderge beriledi?
«Dıana» marapatynyń barlyq jeńimpazy kem degende 12 aıyn úgit-nasıhat jáne oqytýdan bastap, qarajat jınaý men qyzmet kórsetýge arnaǵan.
2024 jyly 30-dan astam elden 80-nen asa volonter toptarǵa jınaldy. Árbir nomınatsııa bes negizgi krıterıı boıynsha qarastyrylyp, baǵalandy. Olar: kózqaras, áleýmettik áser, bózgelerdi shabyttandyrý, jastar arasyndaǵy kóshbasshylyq jáne áleýmettik áreket joly.
Qazylar alqasy keminde úsh tóreshiden, onyń ishinde bir jastar ókilinen quralady.
Aıta keteıik, 2024 jylǵy Dıana syılyǵyna 1 700-den astam ótinim kelip tústi.