18 jasqa tolmaǵan balalardyń shotyna 130,71 dollardan aýdaryldy
ASTANA. KAZINFORM – «Ulttyq qor - balalarǵa» baǵdarlamasy aıasynda 18 jasqa tolmaǵan árbir qazaqstandyq balanyń shotyna 130,71 dollardan aýdaryldy. Bul týraly Qarjy mınıstrligi habarlady.
Memleket basshysy Qasym-Jomart Toqaevtyń bastamasymen qolǵa alynǵan «Ulttyq qor – balalarǵa» baǵdarlamasy ulttyq baılyqty ádil bólý qaǵıdatyn iske asyrýǵa baǵyttalǵan. Jastarǵa bastapqy teń múmkindikterdi berý memlekettiń basymdyqqa ıe mindetteriniń biri. Al Ulttyq qorda jınaqtalǵan qarajat jas otandastarymyzǵa er jetip, úlken ómirdegi alǵashqy qadamdaryn nyq senimmen jasaýǵa jol ashýy tıis.
Bıyl baǵdarlamaǵa 2008-2025 jyldar aralyǵynda týǵan 6 918 656 bala qatysqanyn aıta keteıik. Osyny eskere otyryp, 2026 jyly baǵdarlamanyń aıasynda ár qatysýshyǵa 130,71 dollardan aýdaryldy.
Osy jyly 356 613 bala kámelet jasqa tolyp, olarǵa jıyntyq mólsherinde 44,5 mln dollar aýdarý kózdelgen.
Baǵdarlama iske qosylǵan sátten bastap oǵan qatysatyn balalar úshin úsh jyldaǵy (2024-2026 jyldar) ınvestıtsııalyq kiristi eskere otyryp, jınaqtalǵan qarajattyń jalpy somasy árqaısysyna 370,56 dollardan keledi.
«Ulttyq qor – balalarǵa» jobasyna sáıkes jınalatyn aqsha ómirdegi mańyzdy áleýmettik mindetterdi sheshýge paıdalanylady. Máselen, qarajattyń negizgi bóligi (19,7 mln dollar) 127 446 maquldanǵan ótinim boıynsha turǵyn úı jaǵdaıyn jaqsartýǵa baǵyttaldy. Taǵy da 11,9 mln dollar 78 060 ótinim boıynsha balalardyń bilim alýǵa baılanysty qajettilikterine jumsaldy.
Aýdarymdardy tekserý men qarajatty paıdalaný joldary
Baǵdarlama tetigi tsıfrlandyrylǵan jáne barynsha ashyq. Ata-analar óz balasynyń júıede bar-joǵy men jınaq qarajatyn birneshe tásilmen teksere alady:
· Mamandandyrylǵan kids.enpf.kz saıty (balanyń JSN boıynsha) arqyly;
· eGov.kz portalyndaǵy jeke kabıneti arqyly;
· Halyk, Kaspi.kz jáne Bcc.kz mobıldi qosymshalary arqyly.
Eskeretin jaıt! Bala 18 jasqa tolǵanda jınalǵan soma BJZQ-daǵy arnaıy shotqa aýdarylyp, jınaqtardy elektrondy tsıfrly qoltańbanyń (ETsQ) kómegimen tek alýshynyń ózi ǵana kóre alady.
Turǵyn úıge nemese oqýdyń aqysyna qarajat jiberý úshin qarajat ıesine ýákiletti operatorlar arqyly ótinim berý jetkilikti. «Ulttyq qor – balalarǵa» baǵdarlamasy aıasynda áriptestik maqsatta jumys isteıtin «Otbasy bank» pen Halyk Bank qataryna 2025 jyldyń ortasynan bastap jańa seriktes – «TsentrKredıt Banki» qosylyp, jastardyń tańdaý múmkindigi keńeıgenin aıta ketken oryndy.
Aıta keteıik, 2026 jyly 18 jasqa tolatyn balalar «Ulttyq qor – balalarǵa» baǵdarlamasyna engizile me jáne olar qandaı soma alady? «BJZQ» AQ osy saýalǵa resmı túsinikteme berdi.
Bıyl Ulttyq qordan ár balanyń esepshotyna 130 dollardan aýdarylatyny jaıly Ulttyq bank tóraǵasy Tımýr Súleımenov aıtqan edi.