18 jasqa tolǵan 137 myńnan astam jas alǵash ret daýys berdi

ASTANA. KAZINFORM — 18 jasqa tolǵan 137 myńnan astam jas alǵash ret referendýmda ózderiniń daýys berý quqyǵyn qoldandy. Bul týraly Ortalyq referendým komıssııasynyń tóraǵasy Nurlan Ábdirov málim etti.

— Daýys berý qorytyndylary bul — qazaqstandyqtardyń azamattyq tańdaýynyń kórinisi. Ony biz qurmetteýge jáne qabyldaýǵa tıispiz. Azamattardyń referendýmǵa qatysýy bul — shyn máninde olardyń memleket isine aralasýynyń, óz jaýapkershiligin túsinýdiń jáne sheshim qabyldaýǵa qatysýǵa daıyn ekeniniń kórsetkishi. Biz buryn atap ótkendeı, 38 shet memleket pen 11 halyqaralyq uıymnyń 359 halyqaralyq baıqaýshysy, sheteldik BAQ-tyń 206 ókili qatysqan bolatyn. Shet memleketter men halyqaralyq uıymdardyń baıqaýshylarynyń baǵalaýy boıynsha referendým qoldanystaǵy ulttyq zańnamaǵa jáne Qazaqstan Respýblıkasy qabyldaǵan halyqaralyq mindettemelerge sáıkes ótkizildi, — dedi komıssııa tóraǵasy.

Nurlan Ábdirovtiń sózine qaraǵanda, sheteldik baıqaýshylar jańa Konstıtýtsııa jobasynyń qoǵam men sarapshylar arasynda jarııa túrinde keńinen talqylanǵanyn, usynylyp otyrǵa konstıtýtsııalyq reformaǵa qoǵamnyń úlkne qyzyǵýshylyq tanytyp otyrǵanyn jáne halyqtyń óz erkin bildirý protsesine degen seniminiń joǵary ekenin de atap ótti.

— Baıqaýshylardyń baǵalaýynan azamattyq qoǵam ókilderiniń referendýmǵa belsendi qatysqany da atap kórsetilgen. Máselen, aýmaqtyq referendým komıssııalarynyń derekteri boıynsha daýys berý kúni referendým ýchaskelerinde 256 akkredıttelgen qoǵamdyq birlestikterdiń, kommertsııalyq emes uıymdardyń 45 myńnan asa ókili, Qazaqstannyń buqaralyq aqparat quraldarynyń 1 817 ókili qatysty, — dedi ol.

Komıssııa tóraǵasynyń aıtýynsha, baıqaýshylar daýys berýshi jastar sanynyń artqanyn jáne múgedektigi bar azamattardyń daýys berýi úshin komıssııa músheleriniń barlyq uıymdastyrýshylyq, tehnıkalyq jaǵdaımen qamtamasyz etkenin, daýys berý ýchaskelerinde jaqsy ahýal qalyptasqanyn nazarǵa alǵan.

— Osy rette alǵash ret daýys berýge qatysqan 18 jasqa tolǵan azamattardyń sany — 137 093. Referendýmda daýys berýge qatysqan erekshe jaǵdaılardy qajet etetin múgedektigi bar azmattardyń sany — 46 624, — dedi Nurlan Ábdirov.

Buǵan deıin Ortalyq referendým komıssııasy 15 naýryzda ótken jańa Konstıtýtsııa jobasyna qatysty referendýmnyń túpkilikti qorytyndysyn shyǵarǵan edi.