18 jasymda alǵash ret traktor júrgize bastadym — qyzylordalyq ardager
QYZYLORDA. KAZINFORM — Qyzylorda oblysy Jalaǵash aýdanynyń M.Shámenov aýylynda turatyn Qalımash Maqulbaeva traktor rólin 18 jasynda tizgindegen.
Búginde ol balalary men nemereleriniń qyzyǵy men qýanyshyna bólenip otyr. Al «jas kezimde traktorshy bolǵanmyn» dese, nemereleri tańdana ári senbestikpen qaraıdy eken.
— Segizinshini bitirgesin aýyldan 10 qyz kásiptik-tehnıkalyq ýchılışege mehanızator mamandyǵy boıynsha oqýǵa tústik. Eńbek jolymdy týyp-ósken aýylymda traktor aıdaýdan bastadym. Ol kezde nebary 18-de edim. 50 som jalaqy, 600 som syıaqy beretin. Jastyqtyń býymen sonda esh qorqýdy bilmeıtin edik. Qatar oqyǵan Kúmiskúl qurbymmen birge ne jumys tapsyrsa da júgirip kete beretinbiz. Arasynda aspaz da boldym, ratsııada da otyrdym. Biraq tapsyrma bolsa, kez kelgen ýaqytta traktorymdy otaldyrýǵa daıyn turatynmyn. Turmysqa shyqqannan keıin de joldasymnyń, enemniń ruqsatymen jumysymdy jalǵastyrdym, — dedi eńbek ardageri.
Keıipkerimiz on jyldan kóp ýaqytyn aýyr tehnıka tizgindeýge arnady. Tek tosynnan kelgen apat kesirinen súıikti jumysynan qol úzdi.
— Bir kúni qaınaǵamnyń traktoryna eki-úsh áıel minip, baqshaǵa barǵanbyz. Qaıtar jolda apatqa ushyrap, jolaýshylardyń ishinde maǵan ǵana zardaby tıdi. Aıaq-qolym istemeı qalyp, eki aıdaı aýrýhanada jatyp shyqqan soń meni múgedek dep esepke aldy, — dedi Qalımash Maqulbaeva.
Traktorshy apa sóz arasynda jastyq shaǵydaǵy esteligimen bólisti.
— Týǵan aýylymda, T-28, T-40 markaly traktorlar júrgizdim. Ózim kelin bop túsken Shámenov aýylynda áýeli eski «Belarýs» traktoryn, keıin T-80 traktorynyń tizginin ustadym. Sońǵysy jap-jańa T-82 traktory boldy. Onyń arasynda bala kútimimen demalysta boldym, baqsha ekkenim bar. Bas-aıaǵy 10 jylda 5 traktor aýystyryppyn. Traktor buzylyp qalsa, toqtap qalǵan ornymda jeńil-jelpisin ózim jóndep ala beretinmin. Bilmegen jerimdi ǵana mehanıkterden surap alatynmyn, — dedi ol.
Traktordyń tilin jetik biletin keıipkerimiz jeńil kólikti de birden úırengen. «Úıde balalardyń kóligin otaldyryp júre beremin» deıdi traktorshy apamyz.
Aıta keteıik, Shıeli aýdanynyń ortalyǵynda 15 jyldan beri kólik dóńgelegin jóndeýmen aınalysyp júrgen áıel turady.