18 shilde – Qazaqstan Respýblıkasy Qarýly kúshteriniń áskerı rámizderi kúni
ASTANA.KAZINFORM - 18 shildede Qazaqstan Qarýly kúshterdiń áskerı rámizderi kúni atalyp ótedi. Bul kún 1996 jylǵy 18 shildede Qazaqstan Respýblıkasy Prezıdentiniń Jarlyǵymen Qarýly kúshterdiń áskerı rámizderi bekitilýine oraı belgilengen. Al 2021 jyly Qorǵanys mınıstriniń buıryǵymen bul kún kásibı merekeler men ataýly kúnder tizbesine engizildi.
Áskerı rámizder – memlekettiliktiń jáne áskerı dástúrdiń mańyzdy bóligi. Olar elimizdiń táýelsizdigin, Otan qorǵaýshylar urpaqtarynyń sabaqtastyǵyn jáne Qarýly kúshterdiń memlekettiń qaýipsizdigin qamtamasyz etýge árdaıym daıyn ekenin bildiredi.
Áskerı rámizderge Qazaqstan Respýblıkasy Qarýly kúshteri túrleriniń týlary, áskerı bólimderdiń Jaýyngerlik týlary jáne Qazaqstan Respýblıkasy Qarýly kúshteriniń rámizi jatady. Olardyń árqaısysy qazaq armııasynyń tarıhyn, abyroıyn jáne qundylyqtaryn aıshyqtaıdy.
Áskerı rámizderdiń tarıhy tereńnen bastaý alady. Túrki halyqtarynda jaýyngerlik týlar men rý tańbalary birlik pen erliktiń belgisi bolǵan. Qazaq handyǵy dáýirinde baıraq erkindik pen táýelsizdiktiń, jaýyngerlik ar-namystyń nyshany sanalyp, ony qorǵaý árbir sarbazdyń qasıetti boryshy bolǵan.
Qazaqstan Respýblıkasynyń Qarýly kúshteri qurylǵannan keıin qazaq halqynyń tarıhı murasy men zamanaýı memlekettik dástúrlerdi ushtastyrǵan ulttyq áskerı rámizder júıesi qalyptastyryldy.
Qarýly kúshterdiń rámizi – beıbitshilikti, erkindikti, rýh kúshin jáne Otandy qorǵaýǵa daıyndyqty bildiretin shuǵylaly kún men qalyqtaǵan qyran beınelengen besjuldyz. Qarýly kúshterdiń árbir túriniń óziniń qyzmettik maqsaty men jaýyngerlik dástúrin beıneleıtin jeke týy bar.
Jaýyngerlik tý – áskerı bólimniń jaýyngerlik abyroıynyń, erliginiń jáne dańqynyń qasıetti belgisi. Ol bólimniń tarıhy men jaýyngerlik jetistikterin saqtaıdy. Qalyptasqan dástúr boıynsha Jaýyngerlik týdyń janynda sýretke túsý quqyǵy qyzmette joǵary nátıjelerge qol jetkizgen áskerı qyzmetshilerge beriledi.
Qorǵanys mınıstrligi málimetinshe, áskerı rámizder kúni áskerı dástúrlerdi saqtaýǵa, Otan qorǵaýshylar urpaqtarynyń sabaqtastyǵyn nyǵaıtýǵa jáne Qazaqstan Qarýly kúshteriniń tarıhyna degen qurmetti arttyrýǵa yqpal etedi.
Aıta keteıik, Qarýly kúshterde drondarǵa qarsy qorǵanys tásilderi jetildirip jatyr.
