18 shetel azamaty shekarany buzǵany úshin ustaldy — UQQ

ASTANA. KAZINFORM — Atalǵan fakt boıynsha materıaldar buzýshylardy jaýapkershilikke tartý úshin quqyq qorǵaý jáne sot organdaryna jiberildi. Bul týraly UQQ baspasóz qyzmeti málim etti.

UQK Shekara qyzmeti Memlekettik shekarany kúzetý men qorǵaýdy qamtamasyz etý aıasynda 2025 jylǵy aqpanda quzyrly organdarmen ózara árekettese otyryp, shekara keńistiginde 3 216 Qazaqstan Respýblıkasynyń zańnamalaryn buzýshylary ustaldy. 

Sonyń ishinde:

• 18 shetel azamaty shekarany buzǵany úshin ustaldy;
• 8 shetel azamatymen shekarany buzý áreketteriniń joly kesildi.

Memlekettik shekara arqyly 1 552 zańsyz alyp ótý faktileriniń aldy alyndy, sonyń ishinde: 33 — esirtki zattary, sondaı-aq 800 lıtr prekýrsor; 71 — qarýlar men oq-dáriler (4 dana atý, 1 dana sıgnaldyq, 135 dana sýyq qarýlary, 1 dana granata, 50 dana oq-dáriler, 13 dana elektroshokerler); 29 — dinı ádebıet (555 dana); 638 — jalpy somasy 20 mln teńgeden asatyn janar-jaǵarmaı materıaldary (54 000 lıtrden astam); 627 — jalpy somasy 3,7 mlrd teńgeden astam halyq tutyný taýarlary; 154 — jalpy somasy 1,6 mlrd teńgeden astam shetel valıýtasy. 

Sondaı-aq Kaspıı akvatorııasynda 7 brakonerlik faktileriniń aldy alyndy, sondaı-aq: 4 dana júzý quraldary; jalpy uzyndyǵy 13,6 km tordy quraıtyn brakonerlik aýlaý quraldary; 87 dana (522,3 kg) bekire tuqymdas balyqtar; aldy alynǵan zalal somasy 205 mln teńgeni quraıdy. 

Bul faktiler boıynsha materıaldar buzýshylardy jaýapkershilikke tartý úshin quqyq qorǵaý jáne sot organdaryna jiberildi.

Memlekettik shekarada qandaı da bir shekteý sharalary engizilgen joq, barlyq ótkizý pýnktteri shtattyq rejımde jumys istep tur.

Eske sala keteıik, buǵan deıin UQK Jambyl oblysy jáne Almaty qalasy boıynsha departamentteri prokýratýra organdarynyń úılestirýimen esirtki jetkizý arnasynyń jolyn keskenin jazǵan bolatynbyz.