18 sáýirde Almatyda qar jaýady - TJD eskertý jasady
«Almaty qalasynyń tóenshe jaǵdaılar departamenti «Qazgıdromettiń» málimetin eskere otyryp, 18 sáýir, seısenbi kúni túnde jáne tańerteń jańbyr men qar jaýatynyn, sondaı-aq, jolda kóktaıǵaq, tuman bolatynyn eskertedi. Túnniń birinshi jartysynda soltústik-batystan ekpini sekýndyna 15 metr bolatyn kúshti jel soǵady. Túnde 1-3 gradýs aıaz, kúndiz 6-8 gradýs jyly bolady», - dep habarlady qalalyq TJD baspasóz qyzmeti.
Túngi ýaqytta aýa raıynyń kúrt salqyndaýyna baılanysty qutqarýshylar turǵyn úıdi gaz plıtasymen jylytpaý, elektr jelilerdi shamadan tys paıdalanbaý kerektigin eske salady.
TJD tek aqaýsyz elektr qondyrǵylaryn qoldanýǵa shaqyrdy.
«Aǵashtar men buta tamyrlaryn aıazdan qorǵaý úshin jer betine gýmýs, shymtezek sýbstraty jáne aǵash úgindilerin tóseýge bolady. Olar aýaǵa toly borpyldaq qabat qalyptastyryp, jylýdy saqtaıdy. Ósimdikterdi aıaz bastalǵan kezde plenka nemese spýnbond materıaldarmen japsańyz, jylý jınap úlgermeı qalýyńyz múmkin. Egistikke arnalǵan jerlerdiń jylýyn saqtaý úshin atalǵan is-áreketterdi aldyn ala jasaý qajet», - dep eskertti TJD.
