18 myńnan astam muǵalim tegin kýrstan ótti

NUR-SULTAN. QazAqparat - Qazaqstanda pán muǵalimderiniń biliktiligin arttyrýǵa arnalǵan tegin kýrstar ótip jatyr. Búgingi tańda elimiz boıynsha 18 myńnan astam muǵalim oqýdan ótti. Bul týraly QazAqparat Oqý-aǵartý mınıstrligine silteme jasap habarlaıdy.

Kýrstar osy jyldyń tamyz aıynda bastalǵan bolatyn. Bul kýrstardy «Órleý» biliktilikti arttyrý ulttyq ortalyǵynyń ókilderi ázirlep, ótkizip jatyr. Ortalyq 40 myńnan astam pán muǵalimin oqytýdy josparlap otyr.

«Órleý» ortalyǵy bir aıdyń ishinde 700-ge jýyq kýrs ótkizdi jáne oǵan 18 myńnan astam muǵalim qatysty. Búgingi kúni 5 myń pedagog oqyp jatyr, olar kýrstyń sońynda test tapsyrady. Kásibı biliktiligin arttyrǵysy keletin ustazdar sanynyń jyl sanap artyp kele jatqany qýantady. Mundaı kýrstar ustazdar jumysynyń sapasyna da, bilim sapasyna da, jalpy oqýshylardyń bilimine de oń áser etetinin túsiný mańyzdy», - dep atap ótti Oqý-aǵartý mınıstrliginiń «Órleý» biliktilikti arttyrý ulttyq ortalyǵy» AQ basqarma tóraǵasy Ásel Muhametjanova.

Buǵan deıin «Órleý» ortalyǵynyń 70-ten astam mamany 12 pán boıynsha 44 baǵdarlama ázirlegen bolatyn. Matematıka, ınformatıka, fızıka, hımııa, bıologııa, geografııa, jaratylystaný, qazaq tili, orys tili, aǵylshyn tili, tarıh jáne bastaýysh synyp muǵalimderi biliktilikti arttyrý kýrstarynan tegin óte alady. Kýrstar qarasha aıynyń sońyna deıin jalǵasady.

Kýrstyń sońynda oqytýdyń tıimdiligine taldaý men muǵalimderdiń alǵan bilimine qorytyndy baǵalaý júrgiziledi. Sondaı-aq muǵalimder mindetti túrde test tapsyrýy kerek. Barlyq bólim boıynsha shekti ball jınaǵan muǵalimder sertıfıkat alady.

Foto: gov.kz