1,8 mlrd teńgeni zańdastyrǵan qylmystyq toptyń múshesi Reseıden ekstradıtsııalandy
ASTANA. KAZINFORM – Psıhotroptyq zattardy zańsyz óndirýmen jáne taratýmen aınalysqan uıymdasqan qylmystyq toptyń múshesi Reseıden Qazaqstanǵa ekstradıtsııalandy, dep habarlaıdy Bas prokýratýra.
Tergeý dereginshe, Qazaqstan azamaty qylmystyq toptyń quramynda Temirtaý qalasynda asa iri mólsherde esirtki óndirýdi uıymdastyrǵan. Daıyndalǵan psıhotroptyq zattar men olardyń analogtary keıin Qaraǵandy oblysynyń aýmaǵynda taratylǵan.
Qylmystyq áreketten túsken qarajatty zańdastyrý úshin túrli qarjylyq operatsııalar júrgizilgen. Sonyń ishinde krıptoaıyrbastaý servısteri arqyly 1,8 mlrd teńgeden astam qarajat zańdastyrylǵan. Budan bólek, 600 mln teńgeden astam qarajatqa jyljymaıtyn múlik, bıznes nysandary men kólik quraldary satyp alynǵan. Atalǵan aktıvterdi memleket kirisine aınaldyrý maqsatynda olarǵa tyıym salynǵan.
– Qylmystyq top múshelerinen 10 kelige jýyq mefedron tárkilengen. Qazirgi ýaqytta qylmystyq toptyń jekelegen múshelerine qatysty qylmystyq is sotta qaralyp jatyr, – delingen Bas prokýratýra habarlamasynda.
Qylmystyq toptyń basqa músheleri, sonyń ishinde ekstradıtsııalanǵan kúdikti quqyq qorǵaý organdarynan jasyrynǵandyqtan halyqaralyq izdeýge jarııalanǵan.
Kúdikti ótken jyldyń qazan aıynda Reseı aýmaǵynda ustalǵan. Qazaqstan Respýblıkasy Bas prokýratýrasynyń suraýy boıynsha ol elge ekstradıtsııalanyp, qazirgi ýaqytta tergeý ızolıatoryna qamaldy.
Oǵan taǵylyp otyrǵan qylmystar boıynsha múlkin tárkileı otyryp, 20 jylǵa deıin bas bostandyǵynan aıyrý jazasy kózdelgen.
Buǵan deıin osy qylmystyq toptyń taǵy bir belsendi múshesi Grýzııadan Qazaqstanǵa ekstradıtsııalanǵan.
Aıta keteıik, memlekettik sýbsıdııalardy jymqyrǵan kúdikti Grýzııadan ekstradıtsııalanǵan bolatyn.
