$18 mlrd kiris: Tramp álem chempıonatynyń AQSh ekonomıkasyna áserin aıtty
ASTANA. KAZINFORM — Bıyl ótken fýtboldan álem chempıonaty AQSh ekonomıkasyna $18 mlrd-tan astam kiris ákelip, 160 myńnan astam jumys ornynyń ashylýyna yqpal etti. Bul týraly AQSh prezıdenti Donald Tramp málimdedi, dep Informsports.kz jazdy.
Amerıkalyq kóshbasshy áleýmettik jelidegi paraqshasynda ótken álem chempıonatynyń el ekonomıkasyna áserine toqtalyp, týrızm salasyna tıgizgen yqpalyn atap ótti.
— Amerıkalyq týrızm úshin qandaı keremet jaz boldy. Amerıkalyqtar el ishinde shamamen 300 mlrd mıl jol júrdi, ulttyq saıabaqtarǵa 78 mln adam bardy, al mıllıondaǵan adam áýe kóligin paıdalandy. Tek fýtboldan álem chempıonatynyń ózi ekonomıkamyzǵa $18 mlrd-tan astam kiris ákelip, 160 myńnan astam jumys ornyn qurýǵa múmkindik berdi. Saıahat pen týrızm — bul jumys oryndary, ınvestıtsııalar jáne amerıkalyq kompanııalar men jergilikti qaýymdastyqtarǵa túsetin mıllıardtaǵan dollar, — dedi Donald Tramp.
AQSh prezıdenti týrızm salasy men kólik ınfraqurylymyn damytýǵa baǵyttalǵan sharalar týraly da aıtty.
— Biz bıýrokratııalyq kedergilerdi joıyp, áýe tasymaly júıesin jańartyp, AQSh-qa kelýdi jáne elde bıznes júrgizýdi jeńildetip jatyrmyz. Amerıka Qurama Shtattary bıznes úshin ashyq, al eń jaqsysy áli alda, — dep atap ótti ol.
2026 jylǵy fýtboldan álem chempıonaty 11 maýsym men 19 shilde aralyǵynda AQSh, Kanada jáne Meksıkada ótti. Týrnırge alǵash ret 48 ulttyq qurama qatysty.
AQSh aýmaǵynda 78 match oınaldy. Olardyń qatarynda pleı-off kezeńiniń sheshýshi kezdesýleri men Nıý-Djersı shtatyndaǵy «Metlaıf» stadıonynda ótken fınal bar.
FIFA 2026 jylǵy 1 maýsym men 2 qyrkúıek aralyǵyndaǵy halyqaralyq transfertterge sholý jarııalady. Derekter fýtbolshylar naryǵynda rekordtyq belsendilik baıqalǵanyn, sondaı-aq álem chempıonatynyń oıynshylar transferine yqpal etkenin kórsetti.
Eske salaıyq, Donald Tramp FIFA-nyń alǵashqy «Beıbitshilik syılyǵynyń» laýreaty atandy.
Eýropa Infantınony FIFA prezıdenttigine qaıta saılaýǵa qarsy ekenin jazdyq.
