18 maýsymnan bastap «Salam Air» loýkosteri Almatydan Omanǵa qaıta qatynaıdy
ASTANA. KAZINFORM – Kólik mınıstrligi Kazinform saýalyna joldaǵan jaýabynda sheteldik loýkesterlerdiń Qazaqstannyń áýe tasymalyna kirý múmkindigi týraly málimet berdi.
«Qazirgi ýaqytta Qazaqstanda 10-nan astam bıýdjettik avıakompanııa turaqty reısterdi oryndaıdy: «Air Asia H» (Malaızııa), «IndiGO» (Úndistan), «Jazeera Airways» (Kýveıt), «Wizz Air Abu-Dhabi» (BAÁ), «Air Arabia» (BAÁ), «FlyDubai» (BAÁ), «Pegasus Airways» (Túrkııa), «Air Cairo» (Mysyr), «Red Sea» (Mysyr), «Flynas» (Saýd Arabııasy), «Vietjet Air» (Vetnam) jáne t.b. Sonymen qatar, 2024 jylǵy 14 naýryzdan bastap ońtústik-shyǵys Azııadaǵy eń iri loýkosterlerdiń biri malaızııalyq «Air Asia H» avıakompanııasy aptasyna 4 reıs jıiligimen Kýala-Lýmpýr – Almaty baǵyty boıynsha tikeleı turaqty jolaýshylar reısterin oryndap keledi. Buǵan qosa, osy jylǵy 18 maýsymnan bastap Oman sultandyǵynyń loýkosteri «Salam Air» avıakompanııasy turaqty jolaýshylar reısin Qazaqstanǵa oryndaýdy qaıta jalǵastyrýdy josparlap otyr. Reıster aptasyna 2 ret jıilikpen Almaty – Maskat baǵyty boıynsha Airbus 320 jáne Airbus 321 áýe kemeleriniń tıpterinde oryndalady», - delingen mınıstrlik jaýabynda.
Qazaqstanda «ashyq aspan» rejımi engizilgenine birneshe jyl boldy. Bul rejım sheteldik áýe kompanııalaryna Qazaqstan aýmaǵyna eshqandaı shekteýsiz reıster oryndaýǵa múmkindik beredi.
«Jańa sheteldik bıýdjettik kompanııalar Qazaqstan Respýblıkasyna reıster ashady dep josparlanǵan. Bılet baǵasyna keletin bolsaq, halyqaralyq tájirıbege sáıkes, áýe avıabıletteriniń baǵasy rettelmeıdi. Óıtkeni ol áýe kóliginiń damýyna jáne qyzmet sapasyn joǵarylatýǵa kedergi keltiredi. Alaıda básekelestik óz kezeginde bılet baǵasyna áser etýi múmkin», - dep jazylǵan resmı jaýapta.
