18 qazannan Pavlodar oblysynda karantın kúsheıtiledi

PAVLODAR. QazAqparat - Pavlodar oblysynyń bas memlekettik sanıtar dárigeri Batyrbek Álıev koronavırýstyń taralýynyń aldyn alý maqsatynda óńirde karantın sharalaryn odan ári kúsheıtý týraly qaýly qabyldady, dep habarlaıdy QazAqparat tilshisi.

Atalǵan qaýlyǵa sáıkes, kúsheıtilgen sharalar 18 qazan kúni saǵat 00.00-de kúshine enedi.

Qujatta ǵımarat ishindegi qoǵamdyq tamaqtaný oryndaryna (ashyq aýada qyzmet kórsetýdi qospaǵanda) saǵat 08.00-den 22.00-ge deıin jumys isteýge ruqsat beriletindigi kórsetilgen. Bul rette, nysannyń tolymdylyǵy 30 orynnan aspaýy, áleýmettik ara qashyqtyq jáne ústelder arasyndaǵy 2 metr qashyqtyq, bir ústel basyna 4-6 adamnan otyrǵyzý talaptary saqtalýy tıis.

Ujymdyq, saltanatty, otbasylyq, jáne basqa da is-sharalarǵa tyıym salynady.

Azyq-túlik dúkenderiniń jumys ýaqyty saǵat 22.00-ge deıin ǵana ruqsat beriledi.

Fıtnes-ortalyqtardyń, jattyǵý zaldary men sporttyq-saýyqtyrý ortalyqtarynyń qyzmetteri 30 paıyzdyq tolymdylyqpen saǵat 08.00-den 20.00-ge deıin júrgiziledi.

Saýda ortalyqtarynyń, saýda úıleriniń, saýda jelileriniń jumys ýaqyty saǵat 18.00-ge deıin ǵana bolady.

Demalys kúnderi qoǵamdyq kólikter (avtobýs, tramvaı, baǵdar taksıleri) qozǵalysy toqtatylady.

Al monshalar (syıymdylyǵy 30 paıyzdan aspaıtyndaı) saǵat 08.00-den 20.00-ge deıin ǵana jumys isteıdi.