18 qazanda LRT jolynyń keıbir bóligine elektr qýaty berile bastaıdy

ASTANA. KAZINFORM — 18 qazan kúni saǵat 10:00–den bastap № 109–№ 111 stantsııalar aralyǵyndaǵy ýchaskede LRT elektrmen jabdyqtaý júıesiniń jabdyqtaryna turaqty kerneý beriledi, dep habarlaıdy City Transportation Systems.

Kólik kompanııasynyń málimetinshe, maksımaldy kerneý deńgeıi — 20 000 V (joǵary kerneý).

— Qurylyspen aınalysatyn uıymdar men turǵyndardy qaýipsizdik sharalaryn saqtaýǵa shaqyramyz. Relsterge, kabel jelilerine jáne qural jabdyqtarǵa jaqyndamańyz. Ruqsatsyz stantsııa aýmaǵyna jáne jol aımaǵyna kirmeńiz, — delingen habarlamada.

Sonymen qatar 18 qazan saǵat 00:00-den 19 qazan saǵat 06.00-ge deıin mamandandyrylǵan tehnıkamen LRT kóterý-montajdaý jumystaryn júrgizýge baılanysty Sh. Qaldaıaqov kóshesi men Táýelsizdik dańǵyly qıylystarynda kólikterdiń qozǵalysy ýaqytsha shekteledi.

— Keltirilgen qolaısyzdyq úshin keshirim suraımyz. Turǵyndar men jol qozǵalysyna qatysýshylardan ýaqytsha shekteýlerdi eskerýdi jáne saparlardy aldyn ala josparlaýdy suraımyz, — dep eskertti mekeme.

Aıta keteıik, Astanada LRT synaq rejıminde paıdalanyla bastaldy.

Budan buryn elordaǵa LRT-nyń taǵy eki jyljymaly quramy jetkizilgenin jazǵan edik.