18 qańtarda Astanada ótetin mańyzdy sharalar
ASTANA. QazAqparat - 18 qańtar, beısenbi kúni Astanada birqatar mańyzdy sharalar ótedi. Sonyń basym bóligi QR Prezıdenti Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty bıylǵy Joldaýyn talqylaýǵa arnalǵan, dep xabarlaıdy QazAqparat tilshisi.
Saǵat 10.00-de «Kazakh Tourism» ulttyq kompanııasynyń 100 kúndik qyzmetine arnalǵan shara ótedi. Sol jerde atalǵan kompanııanyń osy ýaqytqa deıin atqarǵan jumysy jaıynda aıtylady. Jýrnalıster QR Memlekettik rámizder alańynda (Qazaqstandaǵy eń úlken Tý ornalasqan jerde - avt.) jınalady.
11.00-de Qazaq memlekettik zań ýnıversıtetinde Joldaýdy talqylaýǵa arnalǵan kezdesý uıymdastyrylady.
11.00-de QR Aqparat jáne kommýnıkatsııalar mınıstrliginiń Ortalyq kommýnıkatsııalar qyzmetinde qazaqstandyq dızaınerlerdiń Parıjdegi «Oriental Fashion Week» sán aptalyǵyna qatysýlaryna arnalǵan baspasóz máslıxaty ótedi. Parıj aptalyǵyna álemniń túkpir-túkpirinen tanymal dızaınerler qatysady. Qazaqstandyq sán sheberleri atalǵan sharaǵa «Rýxanı jańǵyrý» baǵdarlamasy aıasynda attanady.
11.00-de «Sputnik Qazaqstannyń» baspasóz ortalyǵynda áýejaılardyń tarıfterin retteýge arnalǵan baspasóz máslıxaty ótedi.
12.00-de QR Parlament Májilisinde «Nur Otan» fraktsııasynyń keńeıtilgen jınalysy bastalady. Negizi taqyryp - Memleket basshysynyń bıylǵy Joldaýyn iske asyrý sharalaryn talqylaý.
12.00-de Úkimet úıinde QR Ulttyq ekonomıka vıtse-mınıstri Serik Jumanǵarın men QR Qarjy vıtse-mınıstri Berik Sholpanqulovtyń qatysýymen baspasóz máslıxaty ótedi. Spıkerler bıylǵy Joldaýdyń segizinshi baǵyty - Tıimdi memlekettik basqarý týraly aıtyp beredi.
12.20-de Ortalyq kommýnıkatsııalar qyzmetinde «Prezıdent Joldaýynyń strategııalyq maqsattary: Jańa múmkindikter» taqyrybynda baspasóz máslıxaty uıymdastyrylady. Atalǵan sharaǵa QR Prezıdenti janyndaǵy Qazaqstannyń strategııalyq zertteýler ınstıtýtynyń mamandary qatysady. Olar Joldaýdyń barlyq baǵyttaryna qatysty óz pikirlerin aıtady.
15.00-de Ortalyq kommýnıkatsııalar qyzmetinde Qazaqstan zańgerleri odaǵynyń jumysyna qatysty baspasóz máslıxaty ótedi. Sol jerde uıymnyń tóraǵasy Serik Aqylbaı, atqarýshy dırektory Ábdikárim Aqjanov, tóraǵanyń keńesshisi Bolat Baıqadamov jáne «Qazaqstannyń bıznes-zańgerleri» RQB-nyń vıtse-prezıdenti Ánýarbek Sqaqov ótken jylda atqarylǵan jumystar boıynsha esep berip, aldaǵy josparlarymen bólisedi.
16.20-da Ortalyq kommýnıkatsııalar qyzmeti taǵy bir sharany ótkizedi. «Atameken» UKP-nyń tóraǵasy Abylaı Myrzaxmetov pen onyń orynbasary Eldar Jumaǵazıev bıylǵy Joldaýdyń bızneske qatysty tustaryn ashyp bermek.
