−18 gradýs aıaz, jel: Qazaqstanda aldaǵy úsh kúnde aýa raıy kúrt qubylady

ASTANA. KAZINFORM — 17–19 qarashada Qazaqstannyń birqatar óńirinde jańbyr men qar jaýyp, kóktaıǵaq bolady. Qazgıdromet sınoptıkter jeldiń kúsheıýi, tuman jáne túngi ýaqytta −18 gradýsqa deıin aıaz bolatynyn eskertti. 

−18 gradýs aıaz, jel: Qazaqstanda aldaǵy úsh kúnde aýa raıy kúrt qubylady
Foto: Kazinform\JI

Boljamǵa sensek, keń aýqymdy joǵary qysym aımaǵy elimizdiń shyǵysyna qaraı jyljıdy. Onyń áserinen Qazaqstannyń shyǵysynda, ońtústiginde jáne ortalyǵynda jaýyn-shashynsyz aýa raıy basym bolady.

Alaıda antıtsıklonnyń ornyn soltústik tsıklonnyń tereń jyrasy basyp, aldaǵy kúnderi aýa raıy jaǵdaıyn nasharlatady. Aldymen elimizdiń batysynda, keıin soltústik-batysy men soltústiginde jańbyr jáne qar túrinde jaýyn-shashyn jaýady. Kóktaıǵaq qubylystary kútiledi. Respýblıka boıynsha jel kúsheıedi. Soltústik óńirlerde jáne ońtústik oblystardyń taýly aýdandarynda túngi jáne tańerteńgi saǵattarda tuman kútiledi.

Túngi ýaqytta elimizdiń barlyq derlik óńirinde aýa temperatýrasy nólden tómen bolady. Qazaqstannyń ortalyǵynda, shyǵys jáne ońtústik-shyǵys óńirleriniń taýly aýdandarynda aýa temperatýrasy −13…−18°S-qa deıin tómendeıdi.

Kúndiz aýa temperatýrasy elimizdiń batysy men shyǵysynda +5…+10°S-qa deıin, ońtústik-batysynda +10…+15°S-qa deıin, ońtústiginde +10…+20°S-qa deıin, ońtústik-shyǵysynda +10…+18°S-qa deıin kóteriledi. Al soltústik jáne ortalyq óńirlerde aýa temperatýrasy −1…+4°S shamasynda bolady.