1/8 fınal: Fýtzaldan Qazaqstan quramasy Portýgalııany jeńe ala ma

ASTANA. KAZINFORM - Búgin, 26 qyrkúıekte fýtzaldan Qazaqstan quramasy álem chempıonatynyń 1/8 fınalynda Portýgalııamen kezdesedi. 

Búgingi oıyn elorda ýaqytymen 20:00-de bastalyp, «Qazsport» telearnasynan tikeleı efırde kórsetiledi.

Eki qurama buǵan deıin eki márte kezdesip, qazaqstandyq fýtzalshylar ekeýinde qarsylasyna ese jiberdi. 

Aldymen 2000 jyly álem chempıonatynyń birinshi kezeńinde atalǵan qarsylasqa 2:6 esebimen jol berdi. Al, 2021 jyly jartylaı fınalda el quramasy olarmen negizgi jáne qosymsha kezeńde 2:2 esebimen teń túsip, penaltıden 4:5 esebimen jol berdi. 

Qazaqstan bıyl D tobynda Ispanııamen 1:1 esebimen teń oınasa, odan keıin Lıvııany 4:1, Jańa Zelandııany 10:0 esebimen tize búktirdi. Nátıjesinde óz tobynda Ispanııany alǵa jiberip, ekinshi oryn aldy. 

Qazaqstan quramasy qazirge deıin álem chempıonatynyń fınaldyq satysynda 2000, 2016, 2021 jyldarda synǵa túsip, 2021 jyly 4-orynǵa taban tiredi.

Bıyl álem chempıonatynda el namysyn Narýn Serikov, Leonardo Igıta, Arnold Knaýb, Rınat Tóreǵazın, Aqjol Dáribaı, Ábdirasýl Ábdimanapuly, Azat Valıýllın, Leo, Albert Aqbalyqov, Shyńǵys Esenamanov, Birjan Orazov, Dáýren Tursaǵulov, Jahangır Rashıt jáne Dýglas Jýnıor syndy sportshylar qorǵaıdy.

Qazirge deıin álem chempıonatynyń shırek fınalyna Brazılııa, Ýkraına, Paragvaı, Venesýela quramalary joldama aldy.

Sondaı-aq búgin 1/8 fınalda Iran men Marokko kezdesse, 27 qyrkúıekte pleı-off satysynda Taıland pen Frantsııa, Argentına men Horvatııa oınaıdy.