1,7 mln teńgege deıingi grant: ótinimdi qashan jáne qaıda tapsyrý kerek
ASTANA. KAZINFORM — Halyqtyń áleýmettik osal sanattary arasynda kásipkerlik bastamalardy qoldaý maqsatynda 2026 jylǵy 24 maýsym men 8 shilde aralyǵynda Business.enbek.kz portalynda jańa bıznes-ıdeıalardy iske asyrýǵa arnalǵan memlekettik granttardy alýǵa ótinim qabyldaý júrgiziledi. Bul týraly vedomstvonyń baspasóz qyzmeti málim etti.
Grant mólsheri 400 aılyq eseptik kórsetkishti nemese 1 730 000 teńgeni quraıdy. Memlekettik qoldaý qaıtarymsyz negizde kórsetilip, kásipkerlikti damytýǵa, jańa tabys kózderin qalyptastyrýǵa jáne azamattardyń ekonomıkalyq belsendiligin arttyrýǵa baǵyttalǵan.
Grant bir ret qana beriledi jáne ony ár azamat tek bir márte ala alady.
Konkýrsqa jumyssyz retinde tirkelgen azamattar, sondaı-aq memlekettik tirkeýden ótkenine bir jyldan aspaǵan jeke kásipkerler qatysa alady.
— Bul rette úmitkerler kelesi áleýmettik sanattardyń birine jatýy tıis: múgedektigi bar adamdar; qoldanystaǵy «qandas» mártebesi bar azamattar; óńiraralyq qonys aýdarýshylar; memlekettik ataýly áleýmettik kómek alýshylar; kópbalaly otbasylarǵa beriletin memlekettik járdemaqyny alýshylar jáne (nemese) olardyń jubaılary; múgedektigi bar balany tárbıelep otyrǵan tulǵalar jáne (nemese) olardyń jubaılary; asyraýshysynan aıyrylý boıynsha járdemaqy alýshylar, — delingen habarlamada.
Konkýrsqa qatysýdyń mindetti talaptarynyń biri — ótinim bergen kúnge deıingi sońǵy úsh jyl ishinde alynǵan «Bastaý Bıznes» jobasy boıynsha kásipkerlik negizderine oqytý sertıfıkatynyń bolýy.
Úmitkerlerdi irikteýdi usynylǵan bıznes-jobalar negizinde konkýrstyq komıssııalar júzege asyrady. Ótinimderdi qaraý barysynda bıznes-ıdeıanyń ómirsheńdigi men damý perspektıvasy, jobanyń qarjylyq negizdiligi jáne jańa jumys oryndaryn qurý áleýeti baǵalanady.
Ótinim berý tolyqtaı elektrondyq formatta Business.enbek.kz portaly arqyly júzege asyrylady. Qatysý úshin portalǵa tirkelip, ótinim nysanyn toltyrý, bıznes-jospardy júkteý jáne qujattarǵa elektrondyq tsıfrlyq qoltańba arqyly qol qoıý qajet.
Ótinim berý tártibi boıynsha tolyq nusqaýlyqpen myna silteme arqyly tanysýǵa bolady:
Ótinim qabyldaý 2026 jylǵy 8 shildeni qosa alǵanǵa deıin jalǵasady.
Birinshi lek aıasynda Aqtóbe jáne Qyzylorda oblystarynan basqa barlyq óńirlerde 3 764 grant berý josparlanǵan. Jalpy 2026 jyly halyqtyń áleýmettik osal toptaryna 9 myń grant berý kózdelip otyr.
Eske salaıyq, grant qarajaty maqsatty túrde beriledi jáne ony qural-saımandar, eńbek quraldary, tehnologııalyq jabdyqtar, aýyl sharýashylyǵy janýarlary, mal men qus, sondaı-aq kóshetter, butalar, tuqymdar men kóshet materıaldaryn satyp alýǵa jumsaýǵa bolady.
Sonymen qatar kásipkerlik qyzmetti júzege asyrý úshin qajetti úı-jaılardy jalǵa alý shyǵyndaryn tóleýge de grant qarajatyn paıdalanýǵa ruqsat etiledi.
Bul rette grant qarajatyn tutynýshylyq maqsattarǵa paıdalanýǵa jol berilmeıdi. Atap aıtqanda, grant esebinen nesıeler men qaryzdardy óteýge, turǵyn úı satyp alýǵa nemese salýǵa, jer telimderin alýǵa, shetel valıýtasyn, baǵaly qaǵazdardy jáne tsıfrlyq aktıvterdi satyp alýǵa, sondaı-aq aktsızdeletin ónim óndirýge jáne Qazaqstan Respýblıkasynyń zańnamasynda tyıym salynǵan ózge de qyzmet túrlerin júzege asyrýǵa bolmaıdy.
Memlekettik granttar — kásipkerlik jolyn endi bastaǵan azamattardy qoldaýdyń tıimdi quraldarynyń biri. Ol azamattarǵa óz bıznes-ıdeıalaryn júzege asyrýǵa, turaqty tabys kózin qalyptastyrýǵa jáne óńir ekonomıkasynyń damýyna úles qosýǵa múmkindik beredi.
Aıta keteıik, buǵan deıin Astanada qysqa merzimdi oqytý men granttar beriletinin jazdyq.
