1771 úndistiń ólimine aıypty Gvatemalanyń burynǵy prezıdentiniń aqyl-esi kem ekeni anyqtaldy
ASTANA. QazAqparat - Gvatemala sot medıtsına ınstıtýty seısenbide ózi basqarǵan jyldary úndisterdi násilshildikpen qyrǵany týraly is boıynsha sot aldyna qaıta kelýi tıis eldiń eks-dıktatory Efraın Rıos Montty aqyl-esi kem dep tanydy. Dárigerler 89 jastaǵy burynǵy memleket basshysynda júıeli oılap, sheshim qabyldaýyna kedergi keltiretin kognıtıvtik ózgeris baryn anyqtady.
«Qazirgi ýaqytta onyń oılaý qabileti álsiregen, ol ózine taǵylǵan aıypty tıisti dárejede saralaýǵa, sot úrdisiniń barysyn uǵýǵa, ózin-ózi qorǵaýǵa qatysýǵa qabiletsiz, - dep atap ótilgen dárigerlik qorytyndyda. - Sondaı-aq oǵan sot otyrysyna qatysýǵa ruqsat etilmeıdi». Endigi kezekte sońǵy sózdi dıktator isin qarap jatqan sýdıa aıtady. Birinshi satydaǵy sot 2013 jylǵy 10 mamyrda oǵan násilshildigi úshin jáne adamzatqa qarsy qylmysy úshin 80 jylǵa bas bostandyǵynan aıyrý úkimin kesken. Alaıda 21 mamyrda Gvatemala Konstıtýtsııalyq soty bul úkimniń kúshin joıdy. General bılikke 1982 jyly áskerı tóńkeris kezinde kelgen jáne 1983 jyly kezekti áskerı búlik saldarynan taqtan taıǵan.
Ol basqarǵan bir jarym jylda gvatemala áskeri halyqqa qarsy, ásirese úndisterge qarsy jazalaý operatsııalaryn júrgizgen. Quqyq qorǵaý uıymdarynyń baǵalaýynsha, osy ýaqyt ishinde keminde 10 myń adam qaza tapqan, alaıda formaldy túrde Rıos Montt 1771 úndisti óltirdi dep aıyptalýda.
