177 tonna ónim: Aqtóbedegi ferroqorytpa zaýyty álemdik rekord ornatty
AQTÓBE. KAZINFORM – Búgin metallýrgter bir peshten 177 288 keli joǵary kómirtekti ferrohrom aldy. Bul – álemdik rekord. Kórsetkishti WORLD BOOK OF RECORDS (WBR) uıymyna resmı túrde tirkep, ujymǵa sertıfıkat tabystaldy.
Aqtóbe ferroqorytpa zaýytyndaǵy №4 tsehtyń №43 peshi búgin tańerteń álemdik rekord ornatýǵa ázirlendi. Ondaǵan metallýrgtiń eńbegin WORLD BOOK OF RECORDS (WBR) uıymynyń resmı ókili baqylap turdy. Qazaqstandaǵy Jumysshy mamandyqtary jyly jáne «Qazhrom» TUK» AQ-nyń 30 jyldyq mereıtoıyna, Metallýrgter kúnine arnalyp uıymdastyrylǵan sharaǵa ujym tyńǵylyqty daıyndalǵan. Búgin metallýrgter ádettegiden eki ese kóp ónim shyǵardy.
- Bul dúnıejúzindegi eń úlken kórsetkish. Resmı túrde tirkeýge ınspektorlar keldi. Zaýyttaǵy №4 tseh – dúnıejúzindegi jańa ári úlken tseh. Árbir peshtiń qýattylyǵy – 80 MVt. Sáıkesinshe óndiriletin ónim kólemi de joǵary bolady. Búgin soǵan qol jetkizdik,- dedi Aqtóbe ferroqorytpa zaýytynyń dırektory Erjan Abdýlabekov.
Rekord ornatýǵa arnalǵan saltanatty sharaǵa Aqtóbe oblysynyń ákimi Ashat Shaharov qatysty.
Ol zaýyt ujymyn quttyqtap, bul rekord – qazaqstandyq mamandardyń joǵary biliktiligi men eldiń, óńirdiń orasan ındýstrııalyq áleýetiniń aıqyn dáleli ekenin atap ótti.
- Búgin biz tarıhı oqıǵanyń kýási boldyq. Aqtóbe ferroqorytpa zaýyty ónim óndirý kólemi boıynsha álemdik rekord ornatty. Birinshi ret №43 peshten bir tehnologııalyq tsıklde 170 tonnadan astam joǵary kómirtekti ferrohrom óndirildi. Zaýyt jumysshylary kúndiz-túni ystyq-sýyqqa qaramaı eńbek etip, óndiristi álemdik deńgeıge shyǵardy. Bul jetistik kásiporynnyń ǵana emes, búkil qazaqstandyq ónerkásiptiń halyqaralyq standarttarǵa saı ekenin jáne sol standarttardy ózi ornata alatynyn kórsetti. Bul – tek Aqtóbe óńiri men zaýyttyń emes, búkil Qazaqstan ónerkásibiniń áleýetiniń qýatty dáleli», - dedi oblys ákimi.
Táýelsiz sarapshylar, WORLD BOOK OF RECORDS (WBR) ókilderi, metrologııalyq qyzmet jáne tehnıkalyq komıssııa rekordty resmı tirkedi. Metall óndirý, ony salqyndatý, ólsheý men rásimdeý kezeńderi ótti.
- Biz aýyr ónerkásip salasyndaǵy rekordtardy sırek tirkeımiz. Sondyqtan búgingi jetistik erekshe baǵaly. Bul oqıǵa tek bir zaýyttyń ǵana emes, búkil Qazaqstannyń tehnologııalyq bedeline qosylǵan úles jáne eldiń ónerkásiptik áleýetin moıyndaý, - dedi WBR Azııa jáne Afrıka elderi boıynsha bas ofıtseri Qýandyq Qudaıbergenov.
Aıta keteıik, «Qazhrom» AQ-y byltyr óndiristi 14%-ǵa arttyryp, ónim kólemin 1,85 mıllıon tonnadan asyrdy.
Eske salsaq, Qazaqstan ekonomıkasy 6 aıda 6,2 paıyz ósim kórsetti. Negizgi draıverler – kólik jáne qurylys salalary. Saýda jandanyp, taý-ken ónerkásibi 8,4%, óńdeý sektory 5,5%, aýyl sharýashylyǵy 3,7% ósip otyr.