177 mlrd teńge ınvestıtsııa: Mańǵystaýda prokýratýra iri ınvestordyń quqyǵyn qorǵady
AQTAÝ.KAZINFORM - Mańǵystaý oblysynda respýblıkalyq mańyzy bar óndiristik jobalardyń birin júzege asyryp jatqan iri ınvestordyń quqyqtary qorǵaldy, dep habarlaıdy oblystyq prokýratýranyń baspasóz qyzmeti.
Baspasóz qyzmetiniń málimetterine qaraǵanda, ınvestorlardyń quqyqtaryn qorǵaý jónindegi komıtettiń úılestirýimen alkogolsiz sýsyndar óndiretin zaýyt salyp jatqan Carlsberg Central Asia kompanııasynyń zańdy múddelerin qorǵaýdy qamtamasyz etti. Jobaǵa tartylǵan ınvestıtsııalardyń jalpy kólemi 177 mlrd teńgeni quraıdy.
Atalǵan jobanyń iske asyrylýy jańa jumys oryndaryn qurýǵa, eldiń ónerkásiptik áleýetin keńeıtýge jáne ekonomıkaǵa qosymsha ınvestıtsııalar tartýǵa múmkindik beredi.
Investıtsııalyq jobany súıemeldeý barysynda prokýratýra kedendik rásimdeý kezinde bolashaq óndiristik keshendi iske qosý úshin qajetti tehnologııalyq jabdyqtyń negizgi elementi bolyp tabylatyn elektr transformatorynyń kidirtilgenin anyqtady.
Kidiristiń sebebi kedendik deklaratsııany toltyrý kezinde jiberilgen qatelikter bolǵan. Qalyptasqan jaǵdaı ınvestor úshin eleýli quqyqtyq saldarǵa, onyń ishinde kontrabanda belgileri boıynsha ákimshilik jáne tipti qylmystyq jaýaptylyqqa tartylý qaýpine, sondaı-aq jobany iske asyrý merzimderiniń aıtarlyqtaı sozylýyna alyp kelýi múmkin edi.
-Oblys prokýratýrasy qabyldanǵan sheshimderdiń zańdylyǵyna tekserý júrgizdi. Nátıjesinde kompanııanyń áreketterinde qylmystyq quqyqbuzýshylyq belgileriniń joq ekeni anyqtaldy. Ýákiletti organ qylmys quramynyń joqtyǵy týraly resmı qorytyndy shyǵardy. Sonymen qatar ınvestordy ákimshilik jaýaptylyqqa tartýǵa negiz bolatyn mán-jaılar da rastalǵan joq,-delingen habarlamada.
Prokýrorlyq den qoıý sharalarynyń nátıjesinde tehnologııalyq jabdyq bosatylyp, jobany odan ári iske asyrý úshin óndiristik alańǵa jetkizildi.
Osynyń nátıjesinde nysan qurylysynyń merzimine teris áser etýi múmkin ákimshilik kedergiler joıyldy. Qabyldanǵan sharalar ınvestordyń quqyqtaryn qorǵaýdy qamtamasyz etip, jańa óndiristi ýaqytyly paıdalanýǵa engizýge qolaıly jaǵdaı jasady.
Prokýratýra ınvestıtsııalyq jobalardy súıemeldeý jáne ınvestorlardyń quqyqtaryn qorǵaý baǵytyndaǵy jumysyn jalǵastyryp, qolaıly ınvestıtsııalyq ahýaldy qamtamasyz etý jáne adal bıznesti qoldaý boıynsha júıeli sharalardy júzege asyrý ústinde.
Oblys prokýratýrasy ákimshilik kedergilerge jáne ózge de quqyq buzýshylyqtarǵa tap bolǵan ınvestorlardy Investorlardyń quqyqtaryn qorǵaý jónindegi mobıldi toptyń +7 (701) 333-13-12 telefony nemese 115 Call-ortalyǵy arqyly habarlasýǵa shaqyrady.
Osyǵan deıin Shymkentte prokýratýra aralasqannan keıin ınvestorǵa jer ýchaskesi berilgeni týraly jazdyq.
