17,7 myń tonna qaldyq zańsyz kómilgen: «Eco-Mangistau»-ǵa aıyppul salyndy

— Mańǵystaýda óndiristik qaldyqtardy zańsyz kómgen «Eco-Mangistau» JShS-ne 1,73 mln teńge aıyppul salyndy. Mańǵystaý oblysy boıynsha ekologııa departamenti kompanııaǵa jospardan tys tekserý júrgizip, qaldyqtardy basqarý jáne ekologııalyq talaptardy saqtaý kezinde birqatar zańbuzýshylyqty anyqtady — delingen habarlamada.

Qandaı zańbuzýshylyq anyqtaldy?

Tekserý kezinde 2019–2023 jyldary 17 694 tonnadan astam óndiristik qaldyqtyń qaıta óńdelmeı, «Eco-Mangistau» aýmaǵynda jer astyna kómilgeni anyqtaldy.

Bul qaldyqtardy buǵan deıin «QaljanQurylys» JShS qaıta óńdeý úshin qabyldaǵan. Osy jaǵdaıǵa baılanysty 2023 jyly ákimshilik is qaralyp, sot sheshimi shyqqan.

Qaldyqtardy kómý kezinde jer qazý jumystary júrgizilip, topyraqtyń tabıǵı qabaty búlingen.

Sonymen qatar kompanııa óndiristik jáne qaýipti qaldyqtardy saqtaý, qaıta óńdeý jáne kádege jaratý nysanynda qajetti ekologııalyq ruqsattardy almaı turyp, qurylys jáne daıyndyq jumystaryn júrgizgen.

Qandaı talaptar buzyldy?

Ekologııalyq kodekske sáıkes, qaldyqtardy tek arnaıy belgilengen jáne talapqa saı jabdyqtalǵan oryndarda saqtaýǵa bolady.

Sondaı-aq jerdi paıdalaný kezinde topyraqty lastaýǵa, qoqystaýǵa jáne onyń qunarlylyǵyn tómendetýge jol berilmeýi kerek. Eger jer lastansa, onyń saldaryn joıý sharalary qabyldanýy tıis.

Budan bólek, I jáne II sanattaǵy nysandardy tıisti ekologııalyq ruqsatsyz salýǵa jáne paıdalanýǵa bolmaıdy.

Kompanııaǵa qandaı shara qoldanyldy?

Anyqtalǵan zańbuzýshylyqtarǵa baılanysty «Eco-Mangistau» JShS-ne qatysty birneshe ákimshilik hattama toltyryldy.

Nátıjesinde kompanııaǵa jalpy somasy 1,73 mln teńge ákimshilik aıyppul salyndy.

Aıta keteıik, Qazaqstanda qaýipti qaldyqtardy zertteý men baqylaý kúsheıedi.