1700-den asa aqmolalyq medıtsınalyq saraptamaǵa onlaın kezekke turǵan
ASTANA. KAZINFORM — Aqmola oblysynda 1700-den astam turǵyn medıtsınalyq-áleýmettik saraptamadan ótý úshin elektrondyq kezek qyzmetin paıdalandy.
QR Eńbek jáne halyqty áleýmettik qorǵaý mınıstrligi áleýmettik saladaǵy memlekettik qyzmetterdi jetildirý aıasynda oflaın múgedektikti belgileý kezinde elektrondyq kezek engizý jónindegi pılottyq jobanyń alǵashqy nátıjelerin jarııalady. Joba Aqmola oblysynda 2025 jylǵy 20 qarashadan bastap iske qosylǵaly beri jańa tsıfrlyq qyzmetti 1700-den astam azamat sátti paıdalanǵan.
Bul bastama qyzmet alýshylarǵa medıtsınalyq-áleýmettik saraptama bólimderine aldyn ala jazylý arqyly barýyn josparlaýǵa múmkindik beredi. Júıeniń engizilýi azamattarǵa ózine qolaıly kún men ýaqytty tańdaýǵa jaǵdaı jasap, memlekettik qyzmetti alý úderisiniń yńǵaılylyǵyn arttyryp, kezekte uzaq kútýdi boldyrmaıdy.
Jazylý rásimi Áleýmettik qyzmetter portalynda (aleumet.egov.kz) júzege asyrylǵan jáne paıdalanýshylar úshin barynsha jeńildetilgen. Ýaqytty brondaý úshin azamat portalǵa elektrondyq tsıfrlyq qoltańba arqyly kirip, jeke kabınetten qajetti qyzmetti tańdasa jetkilikti. Júıe ótinish berýshiniń turǵylyqty jerine qaraı tıisti medıtsınalyq-áleýmettik saraptama bólimin avtomatty túrde anyqtaıdy.
— Brondaý rásimi aıaqtalǵannan keıin paıdalanýshynyń uıaly telefonyna kúni, ýaqyty, bólimsheniń mekenjaıy jáne talon nómiri kórsetilgen SMS-habarlama jiberiledi. Paıdalanýshylar úshin qosymsha yńǵaıly fýnktsııa — qabyldaý ýaqytyna úsh kún qalǵanda SMS-eskertýdiń qaıta joldanýy. Qajet bolǵan jaǵdaıda azamattar jeke kabıneti arqyly jazylýdyń kúshin joıa alady. Belgilengen ýaqytta kelmegen jaǵdaıda júıe jazbany avtomatty túrde joıyp, bul týraly paıdalanýshyǵa habarlama jiberedi, — delingen habarlamada.
Aqmola oblysyndaǵy pılottyq joba bıylǵy jeltoqsanǵa deıin jalǵasady. Onyń qorytyndysy boıynsha mınıstrlik júıeniń tıimdiligine taldaý júrgizip, elektrondyq kezekti eldiń barlyq óńirine engizý týraly sheshim qabyldaıdy.
Budan buryn
