170 teńge: Petropavl avtobýstarynda jolaqy qymbattady

Petropavlda búginnen bastap qoǵamdyq kólikte júrý bıleti qymbattady, dep habarlaıdy QazAqparat tilshisi.

Petropavl qalasy ákimdiginiń málimetinshe, 25 qyrkúıekten bastap qoǵamdyq kólikte júrý bıleti eresekter úshin kartamen 100 teńge bolady, osylaıshy 20 teńgege qymbattamaq. Al qolma-qol aqshamen esep aıyrysqan jaǵdaıda 170 teńge tóleıdi. Balalar qoǵamdyq kólikte júrgeni úshin kartamen 50, kartasyz 85 teńge beredi. 

Buǵan deıin qala turǵyndary balalarǵa arnalǵan jol júrý kartasynyń satylymda joqtyǵyna shaǵymdanǵan edi.

«SQO Avtokólik odaǵy» ókilderiniń aıtýynsha, másele sheshimin tapty. Úsh aıǵa jýyq satylmaýyna zańnamanyń qatańdatylýy sebep bolǵan. Aıdyń sońynda balalarǵa arnalǵan jol júrý kartalary arnaıy saýda oryndaryna shyǵarylady.

Sonymen qatar qala mańyndaǵy avtobýstarda da jolaqy qymbattady. petropavldan Mamlıýtka, Sokolovka, Belovka eldi mekenderine deıin endi 500 teńge tursa, Beskól aýyla bılet baǵasy 200 teńge boldy. Petropavldan Penkovo, Peterfeld baǵytynda júretin avtobýstarda jol júrý aqysy 250 teńgege deıin kóteriledi. Olshankaǵa deıin - 350, Zatonǵa deıin 300 teńge turady.

Tarıfti kóterý jónindegi jumys byltyr qarasha aıynan qolǵa alyndy, al tamyz aıynyń basynda máslıhat depýtattary ony bekitti. 

Petropavlda sońǵy ret 2017 jyly qoǵamdyq kóliktiń bıleti qymbattaǵan. Qalalyq ákimdik mamandarynyń aıtýynsha, osy aralyqta úlken ınflıatsııa boldy, janar-jaǵarmaı qymbattady, júrgizýshilerdiń eńbekaqysy ósti, basqa da shyǵyndar kóbeıdi.

Qazirgi ýaqytta qala kóshelerine 185 avtobýs 18 baǵyt boıynsha jolaýshy tasymaldaıdy.