170-ten asa áskerı qyzmetshi áskerı paradqa qatysý úshin Astanaǵa keldi
ASTANA. KAZINFORM — Elordalyq vokzalda áskerı paradtyń alǵashqy qatysýshylary — Aqtaý garnızonynyń teńiz jaıaý áskerleri brıgadasynyń áskerı qyzmetshilerin kútip alý rásimi ótti, dep habarlaıdy Kazinform tilshisi.


— Ekinshi Dúnıejúzilik soǵystaǵy jeńistiń 80 jyldyǵyna arnalǵan sherýge qatysý úshin «Batys» óńirlik qolbasshylyǵynan 173 adamnan quralǵan 390-teńiz brıgadasy kelip jetti. Túskennen keıin biz ýaqytsha pýnktke ornalasamyz jáne shamamen 1,5 aı dalalyq lagerde jattyǵamyz, — dedi vzvod serjanty Vıtalıı Frolov.


Aıta keteıik, bıyl Jeńistiń 80 jyldyǵyna jáne Otan qorǵaýshylar kúnine arnalǵan áskerı sherý 7 mamyrda ótedi. Qazaqstanda mundaı sherýler 2020 jyldan beri ótkizilmegen.

— Jeńis kúnine arnalǵan sherýge daıyndyq jumystary bekitilgen josparǵa sáıkes júrgiziledi. Bıyl sherýge Qarýly kúshter men basqa da áskerı qurylymdardan 4 myńǵa jýyq áskerı qyzmetshi qatysady, olardyń 200-den astamy — áıelder. Sonymen qatar, sherýge 200-ge jýyq áskerı jáne avıatsııalyq tehnıka tartylady, — dep habarlady Qorǵanys mınıstrligi.

Іs-shara Ekinshi Dúnıejúzilik soǵystaǵy jeńistiń 80 jyldyǵyn merekeleý aıasyndaǵy basty oqıǵalardyń biri bolady.

Osylaısha qazaqstandyqtardyń bul oqıǵa týraly esteligin, týǵan jerdi qorǵaýdyń mańyzdylyǵyn jáne Qazaqstan halqy dástúrleriniń sabaqtastyǵyn atap kórsetedi.



Buǵan deıin Astana halyqaralyq áýejaıy jolaýshylarǵa Jeńistiń 80 jyldyǵyna, sondaı-aq Otan qorǵaýshylar kúnine oraı ótetin áskerı sherýge daıyndyq jáne ony ótkizý kezinde ushý kestesinde ózgerister bolýy múmkin ekenin habarlady.