170 myń japondyq sherýge shyqty
ASTANA. 17 shilde. QazAqparat - 170 myńnan asa japondyq Eegı saıabaǵynda jınalyp, Fýkýsımadaǵy apattan keıin toqtatylǵan atom elektr stantsııalaryn qaıta iske qosýǵa qarsylyq retinde sherý ótkizýde.
Bul týraly Lenta rýǵa silteme jasap, BAQ.KZ habarlaıdy.
Manıfestanttardyń kóshbasshylary qatarynda Nobel syılyǵynyń laýreaty Kendzabýro Oe bastaǵan birqatar japondyq tanymal adamdar bar. Bul shara "Atom qýaty, qosh bol" degen uranmen ótkizilýde.
Reaktorlardy qaıta qosý jónindegi pozıtsııany ustanǵan úkimet, eldiń jalpaq jurtshylyǵynyń taǵdyryna kóz juma qarap, ashyqtan-ashyq qaterge ıterip otyr, degendi alǵa tartýda jınalǵandar.
Budan buryn habarlanǵandaı, Japon úkimeti Fýkýsımodaǵy apattan keıin toqtatylǵan AES-ti qaıta iske qosý týraly sheshim qabyldaǵan bolatyn. 1-shi shildede Fýkýı provıntsııasyndaǵy AES-tiń úshinshi energoblogynyń jumysy qaıta jandanǵan. Bılik bul qadamyn elde elektr qýatynyń jetispeýshiligimen túsindiredi. Alaıda, tabıǵat apatyna jıi ushyraıtyn elde AES-ti paıdalaný, el úshin úlken qaýip deıdi kóptegen turǵyndar.
"Fýkýsıma-1" stantsııasyndaǵy apat 2011 jyldyń naýryzynda oryn alǵan edi. Jer silkinisi men tsýnamı kesirinen reaktorlardy salqyndatý júıesinde aqaý paıda bolyp, janarmaı sterjenderi balqyp, jarylys bolǵan. Sonyń saldarynan radıatsııa sol mańdaǵy aımaqqa tarap, ol jerler ómir súrýge jaramsyz dep tanylǵan bolatyn.
