170 myńǵa jýyq qyrǵyzstandyq shetelge jumys isteýge ketken

ASTANA. KAZINFORM — 2025 jyly shetelge jumys isteý úshin shamamen 170 myń Qyrǵyzstan azamaty ketken. Bul týraly azamattardy shetelde jumyspen qamtý ortalyǵynyń eńbek kóshi-qony basqarmasynyń basshysy Esenbek Ergeshov málimdedi, dep habarlaıdy Kabar.

Onyń aıtýynsha, olardyń shamamen 25 myńy jumyspen qamtý ortalyǵy men jeke agenttikterdiń kómegimen jumysqa ornalasqan: 5 500 adam — ortalyq arqyly, 19 500 adam — agenttikter arqyly.

— Bul jalpy kóshi-qon aǵynynyń nebári 15%-yn quraıdy. Qalǵan 85% azamattar óz betinshe, jeke baılanystar men «sarafandyq radıoǵa» súıenip ketedi. Ókinishke qaraı, mundaı azamattar jıi qıyn jaǵdaılarǵa tap bolyp, eńbek qanaýynyń nemese adam saýdasynyń qurbanyna aınalady. Al biz arqyly shyqqandardy elge oralǵanǵa deıin baqylap otyramyz, — dedi Esenbek Ergeshov.

Sonymen qatar, ol elde oń dınamıka baıqalyp otyrǵanyn atap ótti. Eger bes jyl buryn jyl saıyn shamamen 1 mıllıon adam tabys tabý úshin shetelge ketse, qazir Qyrǵyzstandaǵy áleýmettik-ekonomıkalyq jaǵdaıdyń jaqsarýyna baılanysty kóptegen azamattar elge qaıta oralyp jatyr.

— Buryn Qyrǵyzstan eńbek kúshin eksporttaıtyn el bolsa, qazir biz kerisinshe shetel azamattaryn tartyp, el ishinde jumys isteýge qabyldap jatyrmyz, — dedi ol.

Osydan buryn Qyrǵyzstanda 2500 ga aýmaqta orman qalpyna keltiriletini aıtyldy.