17 jeltoqsanda eldegi qaı joldarda qozǵalys tártibi ózgerdi

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, Qaraǵandy oblysynda aýa raıynyń nasharlaýyna baılanysty respýblıkalyq mańyzy bar «KAZ01 Astana – Qaraǵandy-Almaty» avtomobıl jolynyń 92-164-shaqyrymynda (Aqmola oblysy shekarasy – Temirtaý qalasynyń termınaly) aralyǵynda kóliktiń barlyq túri úshin jyldamdyq rejımi 80 shaq/saǵatqa ózgertildi.

Aqmola oblysynda respýblıkalyq mańyzy bar «KAZ02 Astana – Kókshetaý (aınalyp ótý joly) – Petropavl – RF shekarasy (Jańa Jol ótkizý pýnkti)» avtojolynyń 19-231-shaqyrymynda (Astana qalasy – Şýchınsk qalasynyń baqylaý-ótkizý pýnkti) avtokóliktiń barlyq túri úshin jyldamdyq saǵatyna 80 shaqyrymnan 60 shaqyrymǵa deıin tómendetildi.

«KAZ01 Astana – Qaraǵandy – Almaty» avtomobıl jolynyń 30-92-shaqyrymynda (Jibek Joly k. stantsııasynan Qaraǵandy oblysy shekarasy) kóliktiń barlyq túri úshin jyldamdyq rejımi 80 shaq/saǵ bolyp ózgerdi.

Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys aıaqtalǵansha saqtalady.

«Astana – Shiderti – Pavlodar – Ýspenka – RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalysqa ýaqytsha shekteý engizildi. Qalqaman eldi mekeninen Astanaǵa qozǵalys Bereke «Qalqaman – Aqsý» kólik aıryǵy arqyly (uzaqtyǵy 6 shaqyrym) jáne Pavlodar qalasynan Qalqaman eldi mekenine qozǵalys «Baıanaýyl» kólik aıryǵy arqyly júzege asyrylady.

Eske salaıyq, buǵan deıin sınoptıkter 17 jeltoqsan kúni Astanada jáne Qazaqstannyń 17 oblysynda qolaısyz aýa raıyna qatysty eskertý jasaǵan edi.