17 jastaǵy qyz ben jigit Qazyǵurt taýynda adasyp ketti
ASTANA. QazAqparat - Ońtústik Qazaqstan oblysynyń Qazyǵurt aýdanynda qutqarýshylar taýda adasyp ketken jigit pen qyzdy qutqardy, dep habarlaıdy QazAqparat QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
21 naýryz kúni Ońtústik Qazaqstan oblysynyń qutqarýshylaryna taýda adasyp ketken 17 jastaǵy qyz ben jigit týraly habarlanǵan. Olar keshkisin qalyń tuman túskendikten qaıtar joldy tappaı qalǵan.
Jastar telefon arqyly ózderiniń naqty qaı jerde ekenin aıta almaǵan, onyń ústine túngi ýaqytta izdeý jumystary qıyndaı túsken.
«Búgin, 22 naýryz kúni saǵat 10:30-da Qazyǵurt aýdanynda Tótenshe jaǵdaılar departamentiniń jedel qutqarý jasaǵy Qazyǵurt taýynda adasyp júrgen jastardy taýyp, týystaryna jetkizdi», - dep málimdedi Imanqulov.
