17 jastaǵy shahmatshy halyqaralyq grossmeıster atandy
ASTANA. KAZINFORM — Shyǵys Qazaqstan oblysynyń 17 jastaǵy shahmatshysy Aldııar Ansat halyqaralyq grossmeıster ataǵyn alý úshin Aktobe Open týrnırinde reıtıngin 2500 upaıdan asyryp, barlyq normatıvti tolyq oryndady. Bul týraly ShQO ákimdigi málim etti.
Aldııar Ansat — Qazaqstannyń talantty jas shahmatshylarynyń biri. Ol alty jasynda eldegi eń jas sport sheberligine kandıdat atansa, 11 jasynda — eń jas FIDE sheberi, 13 jasynda — halyqaralyq sheber, al 15 jasynda Qazaqstan Respýblıkasynyń eń jas eńbek sińirgen sport sheberi ataǵyn aldy.
Onyń sporttyq jolyndaǵy aıtýly jetistikterdiń biri — 10 jasynda Qazaqstan chempıonatynda birden eki jas sanatynda top jarýy. Aldııar 12 jasqa deıingi jáne 14 jasqa deıingi sportshylar arasynda altyn medal jeńip alyp, el shahmaty tarıhyndaǵy biregeı jetistikke qol jetkizdi.
15 jasynda ol eresekter arasyndaǵy Qazaqstan chempıony atanyp, óziniń joǵary sheberligi men zor áleýetin taǵy bir márte dáleldedi.
Aldııar Ansattyń halyqaralyq grossmeıster ataǵyna ıe bolýy — kóp jylǵy úzdiksiz eńbek pen júıeli daıyndyqtyń aıqyn nátıjesi.
Aıta keteıik, Bıbisara Asaýbaeva alǵash ret álemniń úzdik bes shahmatshysynyń qataryna qosyldy.
