17 jastaǵy qazaqstandyq tennısshi alǵash ret chellendjer týrnıriniń shırek fınalyna shyqty

ASTANA. KAZINFORM – Elordada Prezıdent kýbogy úshin tennısten ótip jatqan chellendjer týrnırinde Zańǵar Nurlanuly sensatsııalyq nátıjege qol jetkizdi. 

Zańǵar juptyq synda slovakııalyq Mıhal Kraıchımen birge alǵashqy aınalymda polıak Olaf Pechkovskı – úndistandyq Sıngh Karandy qapy qaldyrdy – 6:4, 6:1. Bul Zańǵar Nurlanulynyń sporttyq jolyndaǵy chellendjer dodasyndaǵy alǵashqy jeńisi edi. Otandasymyz eń sheshýshi tustarda sheberligin kórsetip, sátti oınaı bildi. 

Qazaqstandyq-slovakııalyq dýet jartylaı fınalǵa shyǵý úshin jarystyń 3-raketkalary, japonııalyqtar Taıseı Ishıkava – Kokoro Isomýramen talasady.

Taǵy bir qazaqstandyq Grıgorıı Lomakın aýstralııalyq Edvard Ýıntermen birge shırek fınalǵa ótti. Olar taılyq Maksımýs Djons – grýzııalyq Saba Pýrtseladzeni joldan taıdyrdy – 6:3, 7:6 (7:1). 

Lomakın – Ýınter shırek fınalda týrnırdiń 2-raketkalary, japonııalyqtar Kýsýhara – Nakagavamen kezdesedi. 

Eske sala keteıik, budan buryn Elena Rybakınanyń Monreal týrnıriniń úshinshi aınalymyna joldama alǵanyn jazǵan bolatynbyz.