17 jastaǵy qazaqstandyq ınnovator Venadaǵy álemdik forýmda júlde aldy
ASTANA. KAZINFORM — Qazaqstandyq HydroTech Atm startapy Aýstrııanyń Vena qalasynda halyqaralyq baıqaý júldegeri atandy, dep habarlaıdy QR SІM baspasóz qyzmeti.
Birikken Ulttar Uıymynyń Ónerkásiptik damý uıymy (ıÝNIDO) men Aýstrııa Respýblıkasynyń Federaldyq eýropalyq jáne halyqaralyq ister mınıstrligi birlesip uıymdastyrǵan Halyqaralyq Vena energetıka jáne klımat forýmy sheńberinde qazaqstandyq HydroTech Atm startapy Global Cleantech Innovation Programme (GCIP) halyqaralyq baıqaýynyń júldegeri atandy.
Atalǵan jetistiktiń aıryqsha mańyzy HydroTech Atm jobasynyń negizgi qalaýshysy jáne jetekshisi Dana Qadyrbek GCIP baǵdarlamasynyń eń jas ári jalǵyz 17 jastaǵy qatysýshysymen erekshelenedi. Jas bolýyna qaramastan, D. Qadyrbek nanomaterıaldar negizinde atmosferadan taza aýyz sý alýǵa arnalǵan tolyqtaı avtonomdy qurylǵyny ázirledi. Qazir atalǵan tehnologııa Qazaqstanda pılottyq engizý kezeńinen ótip jatyr. Atap aıtqanda, zerthanalyq synaqtar júrgizilip, beıindi memlekettik organdarmen jáne ǵylymı uıymdarmen tıisti ózara is-qımyl jolǵa qoıylǵan.
Sonymen qatar, forým aıasynda D. Qadyrbek «Jasyl kóshýdi qamtamasyz etý: ornyqty tehnologııalar men ınfraqurylym» taqyrybyndaǵy plenarlyq sessııaǵa spıker retinde qatysyp, halyqaralyq aýdıtorııaǵa óz jobasyn jáne onyń negizgi artyqshylyqtaryn tanystyrdy.
— HydroTech Atm jobasynyń halyqaralyq deńgeıde moıyndalýy qazaqstandyq jas ınnovatorlardyń joǵary áleýetin aıqyn kórsetedi. Bul jetistik Qazaqstannyń sý qaýipsizdigi, ekologııa jáne klımat salalaryndaǵy jahandyq syn-qaterlerge jaýap bere alatyn zamanaýı ári suranysqa ıe tehnologııalyq sheshimderdi usyný baǵytyndaǵy áleýetin de rastaıdy, — delingen mınıstrlik habarlamasynda.
Qazaqstan Ortalyq Azııa óńirinde GCIP baǵdarlamasyna qosylǵan alǵashqy memleket sanalady. 2025 jylǵy jeltoqsanda GCIP-Kazakhstan baǵdarlamasy sheńberinde klımattyq startaptardyń ulttyq baıqaýy ótkizildi. Onyń qorytyndysy boıynsha HydroTech Atm, SpaceLab jáne Forest Hero startaptary júldeger tanylyp, Vena qalasynda ótken Cleantech Days 2026 jahandyq fınalyna qatysty.
Budan buryn qazaqstandyq oqýshynyń TabAI startap jobasy Google grantyn ıelengenin jazǵanbyz.
