17 jastaǵy Ámir Omarhanov Shymkenttegi týrnırdiń shırek fınalyna shyqty

ShYMKENT. KAZINFORM — Qazaqstandyq tennısshi, 17 jastaǵy Ámir Omarhanov Shymkent ITF M15 týrnırinde eki qarsylasyn qapy qaldyrdy.

ATP reıtıngisinde 988-orynda turǵan jas talant aldymen álemniń 680-raketkasy, 27 jastaǵy germanııalyq Adrıan Ottsbahty jarys jolynan taıdyrdy – 6:4, 7:6 (7:5). Tartysty báseke 2 saǵat 22 mınýtqa sozyldy.

Ámir ekinshi aınalymda reıtıngide 903-orynda turǵan reseılik 20 jastaǵy Savelıı Ivanovtan da qaımyqpady. Eki saǵat 3 mınýtqa sozylǵan matchta qazaqstandyq sportshy 7:6 (7:5), 6:3 esebimen jeńiske jetti.

Omarhanov jartylaı fınalǵa shyǵý úshin reıtıngide 884-oryndaǵy Polsha ókili Jaza Saırıchpen talasady. 

Otandasymyz qazirgi sátte ATP Live reıtıngisinde birden 951-orynǵa kóterilip tur. 

Taǵy bir qazaqstandyq tennısshi, álemniń 172-raketkasy Tımofeı Skatov Rım chellendjer dodasynyń jartylaı fınalynan tys qaldy. Ol shırek fınalda 2 saǵat 3 mınýtqa sozylǵan oıynda reıtıngide 191-satydaǵy aýstrııalyq Lýkas Noımaıerge jol berdi – 3:6, 6:7 (3:7).

Eske sala keteıik, budan buryn Aleksandr Býblıktiń Madrıd masters týrnıriniń ekinshi aınalymyna ótkenin jazǵan bolatynbyz.