17 jasta 100 kitap: astanalyq oqýshy kitap oqýdy qalaı ádetke aınaldyrdy
ASTANA. KAZINFORM — Astanalyq 11-synyp oqýshysy Ramazan Oral osy ýaqytqa deıin 100 kitap oqyǵan. 17 jastaǵy jasóspirim kitap oqýdy arnaıy maqsatqa aınaldyrmaı, bir shyǵarmadan ekinshisine kóshý arqyly osy mejege jetken. Bul týraly ol Jibek Joly telearnasynyń «Búgin.LIVE» baǵdarlamasynda aıtyp berdi.
Ramazan Oral — Astanadaǵy № 101 mekteptiń 11-synyp oqýshysy. Ol kitap oqýmen qatar óleń jazady. 200 óleńdi jatqa biledi, ózi de 100-ge jýyq óleń jazǵan.
Onyń aıtýynsha, bastapqyda aldyna 100 kitap oqý mindetin qoımaǵan. Kitapty birinen soń birin oqı kele, ýaqyt óte bul is onyń turaqty ádetine aınalǵan.
— Kitap oqýdy bastaǵanda «100 kitap oqyp bitirýim kerek» dep aldyma úlken maqsat qoıyp, arnaıy merzim belgilegen joqpyn. Bir kitapty aıaqtap, ekinshisine kóship otyrdym. Ýaqyt óte kele kitap oqý ermekke aınaldy. Keıin qarasam, osyndaı kórsetkishke jetip qalyppyn, — dedi Ramazan Oral.
Kitap oqýǵa kim yqpal etti?
Ramazannyń sózinshe, onyń kitapqa qyzyǵýyna otbasy músheleri men ustazdary yqpal etken.
— Kishkentaı kezimizden aldymyzǵa úlken armandar qoıamyz. Óskende úlken tulǵa bolyp, jetistikke jetkimiz keledi. Ol úshin aýqymdy oılaı bilý kerek dep oılaımyn. Buǵan ákem, atam, ájem, synyp jetekshilerim jáne ómirimdegi basqa da adamdar óz septigin tıgizdi. Olardyń barlyǵyna alǵysymdy bildirgim keledi, — dedi ol.
Oqýshy kitaptyń adamnyń oılaý qabileti men sózdik qoryn damytýǵa kómektesetinin atap ótti.
— Kitap oqý durys oılaýǵa úlken septigin tıgizedi. Adamnyń oılaý deńgeıin jaqsartyp, sózdik qoryn damytady. Jalpy kitap oqıtyn adammen sóılesýdiń ózi qyzyq, — dedi Ramazan.
«Kitapqumar» jobasyn bastady
Ramazan qazir mektepte «Kitapqumar» atty avtorlyq jobasyn qolǵa alǵan. Onyń maqsaty — kitap oqıtyn oqýshylardy tanystyryp, olardyń ádebıetke qalaı qyzyqqanyn kórsetý.
Joba aıasynda oqýshylar kitap oqýǵa ne sebep bolǵanyn, bul ádettiń qalyptasýyna kim yqpal etkenin áńgimeleıdi. Alǵashqy keıipkerlerdiń biri — Ramazannyń synyptasy Aınabek.
— Aldaǵy ýaqytta basqa synyptastarymyzdyń kitap oqýǵa qalaı qyzyqqanyn, kitapqumar bolýyna kim nemese ne sebep bolǵanyn kórsetkimiz keledi. Kitap oqý búginde trend ekenin kórsetip, kitap oqıtyn adamdardyń sanyn arttyrý úshin osy jobany júrgizip jatyrmyz, — dedi ol.
Kúnine 10-15 mınýttan kitap oqýǵa bolady
Ramazannyń aıtýynsha, kitap oqýǵa kún saıyn az ýaqyt bólýdiń ózi nátıje beredi. Buǵan ol mekteptegi oqýshylardyń tájirıbesinen kóz jetkizgen.
Geografııa pániniń muǵalimi oqýshylaryna bir kitapty birge oqýdy usynǵan. Balalar kitapty satyp alyp, kún saıyn sabaq nemese úzilis kezinde 10-15 mınýttan oqyǵan.
— Alǵashynda 10-15 mınýt az ǵoı dep oıladym. Keıin balalardan surasam, kitapty oqyp aıaqtaǵandaryn aıtty. Sonda tańǵaldym. Rasynda, kishkentaı qadamdarmen úlken maqsattarǵa jetýge bolady, — dedi Ramazan Oral.
Buǵan deıin 800 kitap oqyǵan astanalyq oqýshynyń kitapqa qalaı qyzyqqany týraly jazǵan edik.
