17 jasar elordalyq boıjetken karaokeden qala ákiminiń kýbogyn jeńip aldy
ASTANA. QazAqparat - Mereke kúni «Jastar» saraıynyń sahnasynda «Bári de án salady» Astana qalasy ákiminiń kýbogy chempıonatynyń fınaly ótti. Vokalmen aınalysatyn 17 jasar qala turǵyny Ánel Smaıylova jeńimpaz atandy. Jarysqa kásipqoı ánshiler de, áýesqoılar da qatysty.
Bul týraly qalalyq ákimdiktiń baspasóz qyzmeti habarlaıdy.
Elorda kúnine oraılastyrylǵan chempıonat Astanada ekinshi ret ótkizilip otyr. Jarysqa 16-dan 75-ke jasqa deıingi adamdar qatysty.
- Kastıng 15 mamyrda ótti. Oǵan 250-den astam adam qatysty. Onyń ishinen úsh jas sanatyndaǵy 60 adam irikteldi: mýzykalyq bilimi bar 16-30 jastaǵylar, mýzykalyq bilimi joq 16-30 jastaǵylar jáne 31-den jasy joǵary adamdar, - deıdi karaokeden chempıonattyń qoıýshy rejısseri Baqytjan Tajenov.
Birneshe apta boıy qatysýshylar vokaldan kásibı oqytýshylarmen jumys istep, sheberlik dáristerine qatysty. Baıqaýdyń ekinshi týry 26 maýsymda ótti. Onyń qorytyndysy boıynsha ár topta 15 adamnan 45 adam shırek fınalǵa joldama aldy.
Aıta keteıik, karaokeden chempıonat - respýblıkamyzda nıet bildirgenderdiń barlyǵy qatysa alatyn jalǵyz baıqaý.
