17 tamyzda Almatyda ustazdardyń tamyz konferentsııasy ótedi

ALMATY. QazAqparat - Almatyda 17 tamyzda pedagogıka qyzmetkerleriniń respýblıkalyq tamyz konferentsııasynyń plenarlyq sektsııalyq otyrysy ótedi. Bul týraly óńirlik kommýnıkatsııalar qyzmetinde ótken brıfıngide Oqý-aǵartý mınıstrligi Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kúderınova málimdedi, dep habarlaıdy QazAqparat tilshisi.

Spıkerdiń aıtýynsha, bıylǵy tamyz konferentsııasynyń taqyryby «Erekshe bilim berýdi qajet etetin balalardy psıhologııalyq-pedagogıkyq súıemeldeý» bolady.

«Konferentsııanyń negizgi maqsaty – erekshe bilim berýdi qajet etetin balalardyń arnaıy jáne ınklıýzıvti bilim alýynyń ózekti máselelerin talqylaý, tájirıbe almasý, arnaıy bilim berý úshin pedagog kadrlar daıarlaý, bilim berý qyzmetteriniń sapasyn qorytyndylaý máseleleri. Sonymen qatar, bul pedagogıkalyq qoǵammen dıalog bolady. Іs-sharaǵa jańashyl pedagogtar, bilim berý uıymdarynyń úzdik basshylary, sarapshylar men ata-analar qoǵamynyń ókilderi qatysady. Spıkerler dóńgelek ústelder, sheberlik synyptary men prezentatsııalar ótkizedi», - dedi Áıgerim Kúderınova.

Onyń aıtýynsha, elimizde búginde 457 arnaıy bilim berý uıymy jumys isteıdi. Onyń ishinde oblystar men qalalar boıynsha arnaıy mektepke deıingi uıymdar – 45, arnaıy mektep uıymdar – 99, psıhologııalyq-pedagogıkıkalyq túzeý kabınetteri – 213, psıhologııalyq-medıtsınalyq-pedagogıkalyq keńester – 87, ońaltý ortalyqtary – 13.

Al erekshe bilim berýdi qajet etetin balalardy oqytý men tárbıeleý ınklıýzıvti bilim berýdi iske asyratyn jalpy bilim beretin mektepter men balabaqshalarda, jalpy bilim beretin uıymdar janyndaǵy arnaıy toptar men synyptarda da júzege asyrylady.