17 shildeden bastap bankterdiń basym bóligi biryńǵaı QR júıesin iske qosty
ASTANA. KAZINFORM – Búgin Astana Ulttyq bankte bankaralyq biryńǵaı QR júıesiniń tanystyrylymy ótti. 17 shildeden bastap jańa servıs iri qazaqstandyq bankterdiń klıentterine qoljetimdi bola bastady. Bul týraly Ulttyq bank tóraǵasynyń orynbasary Bınur Jálenov málimdedi.
Onyń aıtýynsha, jańa júıe iske qosylǵannan keıin ártúrli bankterdiń klıentteri telefon nómiri arqyly bir-birine aqsha aýdara alady.
– Bankterdiń basym bóligi júıege qosyldy. Búgin osy servıske barlyq bankti qosý jumysy aıaqtalyp jatyr. Aldaǵy birneshe saǵat ishinde qaı banktiń klıenti ekenine qaramastan, barlyq qazaqstandyq azamat telefon nómiri arqyly aqsha aýdara alady, – dedi ol.
Sonymen birge bankaralyq biryńǵaı QR arqyly tólem jasaý múmkindigi de kezeń-kezeńimen iske qosylyp jatyr.
– Munyń bárin júzege asyrý ońaı. Banktiń mobıldi qosymshasyn ashyp, QR tólemdi tańdaısyz, keıin kez kelgen termınaldaǵy QR-kodty skanerlep, tólem jasaısyz. Paıdalanýshy úshin eshteńe ózgermeıdi. Eń mańyzdysy – kásipkerlerge qosymsha termınal da, jańa qosymsha da qajet emes. Barlyǵy qazirdiń ózinde jumys istep turǵan ınfraqurylym arqyly júzege asady, – dedi Bınur Jálenov.
Onyń aıtýynsha, jańa qyzmetti paıdalaný úshin bank qosymshasyn jańartý jetkilikti.
– Búginnen bastap ár bank óz klıentterine ne isteý keregin habarlaıdy. Mysaly, iPhone qoldanýshylary App Store arqyly qosymshany jańartýy kerek. Basqa eshteńe qajet emes. Osylaısha jańa servıs qoljetimdi bolady. Qazirdiń ózinde iri bankterdiń basym bóligi ony iske qosty. Jaqyn ýaqytta bankter bul týraly resmı túrde habarlaıdy, – dedi ol.
Eske salaıyq, buǵan deıin qazaqstandyqtar 19 shildeden bastap taýarlar men qyzmetterdiń aqysyn biryńǵaı QR arqyly tóleı alatyny habarlanǵan bolatyn. Dál osy kúni bankterdiń júıege qatysýyn mindetteıtin zań normalary kúshine enedi.
Buǵan deıin QR Ulttyq banki 18 shildede qoldanysqa enetin tsıfrlyq teńgeniń ne ekenin jáne azamattarǵa qandaı tıimdiligi bar ekenin keńirek túsindirgen edi.
