17 shildede Atyraý men Ulytaýda jańa oblys ákimderiniń kandıdatýrasy qaralady
ATYRAÝ. KAZINFORM — 17 shildede Atyraý jáne Ulytaý oblystarynda óńir ákimderiniń laýazymyna usynylǵan kandıdattarǵa kelisim berý máselesi barlyq deńgeıdegi máslıhat depýtattarynyń birlesken otyrysynda qaralady.
Atyraý oblystyq máslıhatynyń habarlaýynsha, depýtattardyń jınalysy 17 shilde kúni saǵat 09:30–da Atyraý qalasyndaǵy Abaı atyndaǵy oqýshylar ortalyǵynda ótedi.
Al Ulytaý oblystyq máslıhatynyń málimetinshe, osy kúni saǵat 11:00–de Jezqazǵan qalasyndaǵy Alashahan kóshesi, 22 mekenjaıynda Ulytaý oblysynyń ákimi laýazymyna usynylǵan kandıdatqa kelisim berý úshin máslıhat depýtattarynyń jınalysy ótedi.
Eki óńirdegi jıyn da Qazaqstan Respýblıkasy Prezıdentiniń 2022 jylǵy 8 maýsymdaǵy № 912 Jarlyǵyna sáıkes uıymdastyrylady. Osy rásim aıasynda oblys ákimi laýazymyna usynylǵan kandıdattarǵa máslıhat depýtattarynyń kelisimi beriledi.
Ázirshe Atyraý jáne Ulytaý oblystary ákimdigine usynylǵan kandıdattardyń esimderi resmı jarııalanǵan joq.
Aıta keteıik, Qazaqstan zańnamasyna sáıkes oblys ákimderin Memleket basshysy taǵaıyndaıdy. Alaıda oǵan deıin Prezıdent usynǵan kandıdattyń kandıdatýrasy tıisti óńirdegi oblystyq, qalalyq jáne aýdandyq máslıhat depýtattarynyń qaraýyna shyǵarylady.
Eske salaıyq, buǵan deıin Pavlodar oblysy ákiminiń jańa orynbasary taǵaıyndalǵanyn habarlaǵanbyz.
