17 shilde. Tulǵalar týǵan kún

ASTANA. QazAqparat - Búgin, 17 shilde tulǵalardan kimder dúnıege kelgen? QazAqparat oqyrmandaryna esimder kúntizbesin usynady.

ESІMDER

117 jyl buryn (1906-1983) kompozıtor, pedagog, Qazaq KSR-iniń halyq ártisi, Qazaq KSR Memlekettik syılyǵynyń laýreaty, qazaq halyq mýzykasyn jınaqtaýshy Latıf Abdýlhaıuly HAMIDI dúnıege keldi.

Tashkent halyq aǵartý ınstıtýtyn, Máskeýdiń birinshi mýzykalyq tehnıkýmyn, Máskeý konservatorııasy janyndaǵy tatar opera stýdııasyn bitirgen.

Qazaqtyń halyq aspaptar orkestriniń dırıjeri bolyp, Qazaqtyń Petr Chaıkovskıı atyndaǵy mýzykalyq ýchılışesinde, Qazaq konservatorııasynda ustazdyq etken. Kompozıtordyń Uly Otan soǵysy jyldary jazǵan «Attanyńdar maıdanǵa», «8-gvardııa dıvızııasynyń áni», «Batyr qyz», «Núrken» ánderi tyńdarmanyn qaharmandyq sezimge bóledi. Ol qazaq mýzykasyna tuńǵysh vals janryn engizip, «Qazaq valsi», «Bulbul» ánderin shyǵarǵan. Sondaı-aq onyń ásem áýenimen erekshelenetin valsteri, horlary, sımfonııalyq orkestr, halyq aspaptar orkestri úshin kameralyq-aspaptyq shyǵarmalary, qoıylymdar men kınofılmderge arnalǵan mýzykalary bar. Kompozıtor qazaqtyń opera ónerin órkendetýge de úlken úles qosyp, «Abaı», «Tólegen Toqtarov», «Jambyl» operalaryn, «Jambyl men Aıkúmis» mýzykalyq pesasyn, «Balbulaq» operettasyn jazdy. Sonymen qatar «Dombyra úırený mektebi» (B. Ǵızatovpen birge), «Dırıjerlik etýdiń negizderi» (H. Tastanovpen birge), t.b. zertteý eńbekteri bar.

3 márte Eńbek Qyzyl Tý ordenimen, medaldarmen marapattalǵan.

76 jyl buryn (1947-2017) sýretshi, músinshi Baqytjan Álimbaıuly ÁBІShEV dúnıege keldi.

Aqtóbe qalasynda týǵan. Almaty orta mektebiniń 10 jyldyq synybyn jáne Almaty Gogol atyndaǵy sýret ýchılışesin 1969 jyly aıaqtaǵannan soń, Sýrıkov atyndaǵy Máskeý memlekettik kórkemsýret ınstıtýtyna oqýǵa tústi.

1975 jyly Almaty qalasyna oralyp, ómiriniń sońyna deıin shyǵarmashylyq oılaryn júzege asyrý úshin jumys istedi. 1976 jyly Almaty kórkemsýret ýchılışesinde kompozıtsııa men músin ónerinen sabaq bere bastady. 1978 jyldan - T. Júrgenov atyndaǵy Almaty teatr-kórkemsýret ınstıtýtynyń oqytýshysy. Jumystary Qazaqstannyń plastıkasyndaǵy ulttyq qaharmandar men adamı keıipkerlerdiń beınelerin jańǵyrtýǵa eleýli úles qosty. Astana qalasynda Atatúrik, Álııa Moldaǵulova men Jaıaý Musaǵa, Almaty qalasynda T.Bokın, J. Jabaev, K. Ázirbaevqa eskertkish ornatty. Aqtóbe qalasynda - Á. Moldaǵulova, Kıreev, A. Jubanov, Máskeý qalasynda - Á. Moldaǵulova jáne t. b. eskertkish jasady. Stanoktyq sıpattaǵy jumystar Qazaqstan qalalarynyń murajaılarynda jáne shetelderde qoıylǵan. «Olımpıets» kompozıtsııasy Lozan-Shveıtsarııadaǵy Olımpıada komıtetiniń shtab-páterinde, Germanııadaǵy «Kúıshi» jeke kollektsııasynda, Máskeýdegi «Tomırıs» murajaıynda ornalasqan. «Qulager», «Umaı» jumystary QR Prezıdentiniń rezıdentsııasyna qoıyldy.

Sýretshi oryndaǵan sońǵy monýmentaldy-músindik kompozıtsııa - «Isataı men Mahambet». Ol 2003 jyly Mahambetke arnalǵan mereıtoılyq jıynda sáýlet-kórkem memorıaldyq keshenniń ortalyq bóliginde ashyldy.

66 jyl buryn (1957) N. Nazarbaev ortalyǵynyń Konfessııaaralyq jáne órkenıetaralyq dıalogty damytý jónindegi basqarma tóraǵasy Bolat Serǵazyuly SÁRSENBAEV dúnıege keldi.

Almaty qalasynda týǵan. Almaty shet tilderi pedagogıkalyq ınstıtýtyn, ál-Farabı atyndaǵy Qazaq memlekettik ýnıversıtetin támamdaǵan.

Eńbek jolyn 1978 jyldyń tamyzynda 3-shi balalar temir jol aýrýhanasynyń aǵylshyn tili muǵalimi bolyp bastady. 1980-1985 jj. Alma-Aty q. qalalyq atqarý komıtetiniń Іshki ister basqarmasynda qyzmet etti. 1985-1986 jj. – Qazaqstan kommýnıstik partııasy Keńes aýdandyq komıtetiniń nusqaýshysy. 1986-1989 jj. – Qazaqstan LKJO Alma-Aty oblystyq komıtetiniń hatshysy. 1989-1990 jj. – Qazaqstan kommýnıstik partııasy Alma-Aty oblystyq komıtetiniń nusqaýshysy. 1990-1991 jj. – QazKSR Joǵary keńesiniń aǵa keńesshisi. 1991-1992 jj. – Qazaqstan Respýblıkasy Syrtqy ekonomıkalyq baılanystar mınıstrliginiń bas zań keńesshisi. 1992-1993 jj. – Alma-Aty q. Máskeý aýdandyq ákimshiligi basshysynyń orynbasary. 1994-1995 jj. – «Dańq» korporatsııasynyń vıtse-prezıdenti. 1995-1997 jj. – Qazaqstandaǵy «McKenna&Co International» brıtandyq zań fırmasy ókildiginiń basshysy. 1997-2001 jj. – Qazaqstan Respýblıkasynyń Izraıl memleketindegi Elshiliginiń birinshi hatshysy, keńesshisi. 2001-2003 jj. – Qazaqstan Respýblıkasy Syrtqy ister mınıstrligi halyqaralyq zań departamenti dırektorynyń orynbasary. 2003-2005 jj. – Gonkong jáne Makao qalalarynda (QHR) Qazaqstan Respýblıkasy Bas konsýldyǵynyń Bas konsýly. 2005-2007 jj. – Grek Respýblıkasynda Qazaqstan Respýblıkasy Dıplomatııalyq mıssııasynyń ýaqytsha rastalǵan ókili. 2007-2014 jj. – Qazaqstan Respýblıkasynyń Iordan Hashımıttik Koroldigindegi Tótenshe jáne Ókiletti Elshisi. 2008-2014 jj. – Qazaqstan Respýblıkasynyń Irak Respýblıkasyndaǵy Tótenshe jáne Ókiletti Elshisi mindetin qosa atqarýshy. 2012-2014 jj. – Qazaqstan Respýblıkasynyń Lıvan Respýblıkasyndaǵy, Palestına memleketindegi Tótenshe jáne Ókiletti Elshisi mindetin qosa atqarýshy. 2014-2019 jj. – Qazaqstan Respýblıkasynyń Úndistan Respýblıkasyndaǵy Tótenshe jáne Ókiletti Elshisi. 2015-2019 jj. – Qazaqstan Respýblıkasynyń Shrı-Lanka Demokratııalyq Sotsıalıstik Respýblıkasyndaǵy Tótenshe jáne Ókiletti Elshisi mindetin qosa atqarýshy. 2017 j. – Qazaqstan Respýblıkasynyń Azııa jáne Tynyq muhıt aımaǵynda tehnologııalyq transfer ortalyǵynyń resmı ókili (ATTTO, Azııa jáne Tynyq muhıt aımaǵy úshin ekonomıkalyq jáne áleýmettik komıssııa jónindegi Birikken Ulttar Uıymynyń aımaqtyq mekemesi). 2019-2020 jj. – QR SІM Erekshe tapsyrmalar jónindegi elshisi. 2020-2021 jj. – «Kazakh Invest» UK Basqarma Tóraǵasynyń keńesshisi.

2021 jylǵy 18 aqpannan Konfessııaaralyq jáne órkenıetaralyq dıalogty damytý jónindegi N. Nazarbaev ortalyǵynyń Basqarma Tóraǵasy qyzmetine taǵaıyndaldy.

«Qurmet» ordeni, birinshi dárejeli Táýelsizdik ordeni («Wisam al-Istiqial», Iordanııa), «Eren eńbegi úshin altyn medal» ordenimen (Palestına) marapattalǵan.

55 jyl buryn (1968) Qazaqstan Respýblıkasy Úkimet basshysy apparatynyń kadr jumysy bóliminiń meńgerýshisi Amangúl Qumarbekqyzy YBYRAEVA dúnıege keldi.

Semeı oblysynda týǵan. 1990 jyly Almaty arhıtektýralyq-qurylys ınstıtýtyn «ınjener-qurylysshy-tehnolog» mamandyǵy boıynsha aıaqtaǵan, Qazaqstan Respýblıkasy Prezıdenti janyndaǵy MBA-synda, Frantsııanyń Ulttyq Memlekettik basqarý mektebinde (ENA), Duke University (SShA) qaıta daıarlaý jáne biliktiligin arttyrý kýrstarynda ótken.

Eńbek jolyn 1990 jyly «Kazgıproagropromstroıındýstrııa» MQK tehnologııalyq bólimniń ınjeneri qyzmetinen bastaǵan. 1992-1994 jj. – Almaty qalalyq ákimshiliginde; 1994-1998 jj. – Qazaqstan Respýblıkasy Mınıstrler Kabınetiniń ınspektory, joǵary jáne ortalyq atqarýshy organdardy Aqmola qalasyna kóshirý boıynsha Memlekettik komıssııanyń referenti, aǵa referenti; 1998-2010 jj. – Qazaqstan Respýblıkasy Premer-Mınıstri Keńsesiniń aǵa referenti, konsýltanti, sektor meńgerýshisi; 2010-2019 jj. – Qazaqstan Respýblıkasy Premer-Mınıstri Keńsesiniń Memlekettik qyzmet jáne kadr jumysy bólimi meńgerýshisiniń orynbasary, Qarjy-sharýashylyq jáne kadr jumysy bólimi meńgerýshisiniń orynbasary, Basshylyq Hatshylyǵynyń meńgerýshisi; 2019-2023 jj. – Qazaqstan Respýblıkasy Premer-Mınıstri Keńsesiniń Kadr jumysy bóliminiń meńgerýshisi;

2023 jylǵy aqpannan bastap – Qazaqstan Respýblıkasy Úkimeti Apparatynyń Kadr jumysy bóliminiń meńgerýshisi.

54 jyl buryn (1969) Qazaqstan baspasóz klýbynyń prezıdenti Ásel Ádilqyzy QARAÝYLOVA dúnıege keldi.

IPRA (Halyqaralyq jurtshylyqpen baılanys qaýymdastyǵy) múshesi, PR-shy klýbyn uıymdastyrýshylardyń biri, Qazaqstan Respýblıkasy Jýrnalıstıka akademııasynyń akademıgi.

Almaty qalasynda týǵan. Qazaq memlekettik ýnıversıtetin, Qazaqstan menedjment, ekonomıka jáne boljaý ınstıtýtyn, AQSh-tyń Mıssýrı-Kolýmbııa ýnıversıtetin bitirgen. «Lenınskaıa smena» gazetiniń shtattan tys tilshisi bolǵan. 1994-1995 jyldary – USAID menedjeri.

Qazirgi qyzmetinde 1995 jyldan bastap isteıdi. Sonymen qatar Qazaqstan Respýblıkasy Prezıdenti janyndaǵy Shetel ınvestorlary keńesi syrtqy ımıdj boıynsha tobynyń múshesi, PR naryǵy problemalary boıynsha maqalalardyń turaqty avtory, jetekshi bıznes mektepterdiń oqytýshysy.

Ol otandyq PR naryǵyn damytýǵa úles qosty, PR jáne kommýnıkatsııa salasynda 15 jyldyq jumys tájirıbesi bar.

50 jyl buryn (1973) Qazaqstan Respýblıkasy Ulttyq ekonomıka mınıstriniń keńesshisi Lázzat Kerimqulqyzy RAMAZANOVA dúnıege keldi.

Ońtústik Qazaqstan oblysynda týǵan. Almaty qalasyndaǵy Qazaq memlekettik álem tilderi ýnıversıtetin (1995), Astana qalasyndaǵy Qazaq memlekettik zań akademııasyn bitirgen (2001).

Eńbek jolyn 1994-1995 jyldary bank júıesinde qyzmetker bolyp bastaǵan. 1995-1998 jyldary Qazaqstan respýblıkasynyń Maındaǵy Frankfýrt q. Bas konsýldyǵy jumys istegen. 1998-1999 jyldary – QR SІM baspasóz-attashesi, Ákimshilik jáne baqylaý departamentiniń attashesi. 1999-2002 jyldary QR Qarjy mınıstriniń hatshylyǵynda istedi. 2002-2003 jyldary – QR EBJM Halyqaralyq qarjy qatynastary departamentiniń bólim bastyǵy. 2003-2005 jyldary – «Dala group» JShS Bas dırektory. 2006-2007 jyldary – QR Qarjy mınıstrligi apparatynyń basshysy. 2007-2008 jyldary – QR Qarjy mınıstrligi Dármensiz boryshkerlermen jumys jónindegi komıteti tóraǵasynyń orynbasary. 2008-2009 jyldary – QR QM Qarjylyq baqylaý komıteti Almaty oblysy boıynsha Qarjy baqylaý ınspektsııasy bastyǵynyń orynbasary. 2011-2013 jyldary – QR QM Qorǵanys, quqyq qorǵaý júıesi jáne memlekettik organdar salasyndaǵy bıýdjettik baǵdarlamalardyń oryndalýyn taldaý, iske asyrylýyn baǵalaý jáne josparlaý departamentiniń dırektory. 2019-2020 jyldary – «Atameken» QR UKP basqarma tóraǵasynyń orynbasary. 2019-2020 jyldary – QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy. Qazaqstan Respýblıkasy Parlamenti Májilisiniń VII shaqyrylymynyń depýtaty, Áleýmettik-mádenı damý komıtetiniń múshesi (14.01.2021-19.01.2023).

2023 jyldyń aqpanynan bastan qazirgi qyzmetinde.

42 jyl buryn (1981) QR Aýyl sharýashylyǵy vıtse-mınıstri Rústem Jomartuly QURMANOV dúnıege keldi.

Soltústik Qazaqstan oblysynda týǵan. Sh. Ýálıhanov atyndaǵy Kókshetaý memlekettik ýnıversıtetin támamdaǵan. Ekonomıka ǵylymdarynyń kandıdaty ǵylymı dárejesi bar.

Eńbek jolyn 2003 jyly QR AShM Agroónerkásiptik keshenindegi memlekettik ınspektsııa komıtetiniń Aqmola oblystyq aýmaqtyq basqarmasynyń Ekonomıkalyq taldaý bóliminiń jetekshi mamany retinde bastaǵan. 2012–2013 jyldary QR AShM ınvestıtsııalyq saıasat departamentiniń dırektory qyzmetin atqarǵan. 2013–2015 jyldary – QR AShM Veterınarlyq baqylaý jáne qadaǵalaý komıtetiniń tóraǵasy. 2015 jyldan bastap 2016 jylǵa deıin QR Ulttyq kásipkerler palatasynyń agroónerkásiptik kesheninde komıtet hatshysy bolyp jumys istegen. 2017 jyldyń shilde aıynan bastap QR Aýyl sharýashylyǵy vıtse-mınıstri laýazymyn atqarǵan; «QazAgro» holdınginiń basqarma tóraǵasy (2018-2019).

Qazirgi qyzmetine 2019 jyldyń naýryz aıynda taǵaıyndaldy.