17 senatordy saılaýǵa 254 mln teńge jumsalady
NUR-SULTAN. QazAqparat - QR Parlamenti Senaty depýtattaryn saılaýǵa 254,5 mln teńge qarjy jumsalady. Bul týraly QR Ortalyq saılaý komıssııasynyń hatshysy Sábıla Mustafına aıtty, dep habarlaıdy QazAqparat tilshisi.
QR OSK Senat depýtattaryn saılaýǵa qansha qarjy bólinetindigin jarııalady
«QR Parlamenti Senatynyń depýtattaryn saılaýǵa respýblıkalyq bıýdjetten Ortalyq saılaý komıssııasyna 254,5 mln teńge bólindi. Respýblıkalyq bıýdjet qarajaty esebinen saılaý komıssııalaryn uıymdastyrý jáne qyzmet shyǵyndary, tańdaýshy sanalatyn máslıhat depýtattarynyń is-sapar jáne kólik shyǵyndary, saılaý naýqanyn uıymdastyrýǵa qajetti polıgratsııalyq qyzmetter shyǵyndary jabylady. Sonymen qatar saılaý ýchaskelerin daıyndaý, buqaralyq aqparat quraldaryna aqparat taratý jáne ózge de shyǵyndar óteledi. Bul rette, respýblıkalyq bıýdjet qarajatynan qarjylandyrý osy maqsatta arnaıy ashylatyn esepshottar arqyly jergilikti atqarýshy organdardyń esebinen júzege asyrylady. Ortalyq saılaý komıssııasy árbir óńirge bóletin soma tańdaýshylardyń sanyna jáne Senat depýtattyǵyna kandıtattardyń sanyna baılanysty bolady», - dedi ol.
Sábıla Mustafınanyń aıtýynsha, atalǵan qarajatqa aýmaqtyq saılaý komıssııalary ıelik etedi. Al Senat depýtattyǵyna kandıdattardyń shyǵyndaryn qarjylandyrý somasy sál keıinirek Ortalyq saılaý komıssııasynyń basqa qaýlysymen aıqyndalatyn bolady. Jalpy, buǵan deıingi saılaý naýqanynda árbir kandıdatqa 400 myńnan 600 myń teńgege deıin bólingen.
Aıta keteıik, búgin Memleket basshysy Qasym-Jomart Toqaevtyń QR Parlamenti Senaty depýtattarynyń saılaýyn 2020 jylǵy 12 tamyzǵa taǵaıyndaý týraly qaýlysy shyqty.
Osyǵan oraı QR Ortalyq saılaý komıssııasynyń onlaın rejımde otyrysy ótip, onda saılaýǵa qatysty kúntizbelik is-sharlar jospary bekitildi jáne erteńnen bastap Senat depýtattyǵyna kandıdattardy usyný bastalatyndyǵy aıtyldy. Sondaı-aq úmitkerlerge qoıylatyn talaptar jarııa etildi.
