17 myń shymkenttik memqyzmetterdi Telegram arqyly alǵan

TÚRKІSTAN. QazAqparat - Elimizde memlekettik qyzmetter usynatyn telegramdaǵy EgovKzBot-qa bıyl bir jyl tolyp otyr. Osy ýaqyt aralyǵynda bul qyzmet túrin 17 myńnan astam shymkenttik paıdalanyp úlgerip, olarǵa 47 myńnan astam qyzmet túri kórsetilgen, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasynyń Shymkent qalasy boıynsha fılıalynyń baspasóz qyzmeti Altynaı Tataevanyń aıtýynsha, búginde mıllıonnan asa turǵyny bar shahar halqy úshin bottaǵy qyzmetter men servıster sany 25-ke jetken. Ony qoldanýshylar jaqyn jerdegi HQO-da kezek brondap, ózin boryshkerler tiziminen teksere alady. Turǵyndarǵa qajetti degen narkologııalyq, psıhonevrologııalyq, týberkýlezge qarsy dıspanserler esebinde turmaýy jónindegi anyqtamalar da ortalyqtardan berilip, dáriger qabyldaýyna onlaın túrinde jazylýǵa múmkindik jasalǵan. Bot arqyly anyqtamalardy bir mınýttyń ishinde alyp, kerekti elektrondyq poshtaǵa joldaýǵa da bolady.

«Turǵyndarǵa qajetti anyqtamalardy HQO-ǵa barmaı-aq alýǵa bolady. EgovKzBot Telegram-botynyń turaqty paıdalanýshysy bolý úshin azamattar tek bir ret mobıldik azamattar bazasynda tirkelýi qajet. Muny egov.kz elektrondy úkimet portalynyń jeke kabınetinde nemese kez kelgen HQO-da jasaýǵa bolady»,- deıdi Altynaı Tataeva.