17 myń oryn kerek – Elorda ákimi mekteptiń jetispeýshiligi jaıly
NUR-SULTAN. QazAqparat – Nur-Sultan qalasynyń ákimi Altaı Kólginov elordadaǵy mekteptiń jetispeýshiligine qatysty jaǵdaıdy túsindirdi, dep habarlaıdy QazAqparat tilshisi.
«Qazirgi tańda elordada 108 mektep bar. Onyń 87-si memlekettik mektep bolsa, qalǵany jeke jáne odan bólek 4 respýblıkalyq mektep bar. 1 qyrkúıekte mektep tabaldyryǵyn 24 myń bala attaıdy dep kútip otyrmyz. Salystyrý úshin aıta keteıin: ótken jyly birinshi synypqa 18 myń bala barǵan bolatyn. Ózińiz estip otyrǵandaı, oqýshylardyń sany kóbeıip barady. Sol sebepti, 17 myń orynnnyń jetispeıtini baıqalady», - dedi Altaı Kólginov Úkimet otyrysynan keıin tilshilerdiń suraǵyna jaýap bere otyryp.
Onyń aıtýynsha, bul máseleniń sheshimin tabý úshin aldaǵy bes jylda Nur-Sultanda 37 mektep salynýy tıis.
«Bizdiń boljam boıynsha, 1 qyrkúıekte úsh aýysymdy 8 mektep bolady. Sondyqtan, elordany damytýdyń keshendi josparyna sáıkes, aldaǵy bes jylda 37 mektep salýymyz kerek. Biraq, bul rette respýblıkalyq bıýdjetke ǵana ıek artyp otyrý jaraı qoımas. Jaqynda ınvestıtsııalyq keńeste 11 jeke mektepti qoldadyq. Ol mektepter jeke ınvestıtsııalardyń esebinen salynady. ıAǵnı, qadam-qadam saıyn másele sheshimin tabýy tıis. Osy jyly 1 qyrkúıekke deıin 8 mektep, 5 qosymsha nysan jáne 3 jańa mektep paıdalanýǵa beriledi. Bul 5 myń oryndy jabýǵa septigin tıgizedi», - dedi ol.
Shahar basshysy óz sózinde atap ótkendeı, máseleni birden sheshý múmkin emes.
«Faktynyń aty fakt – 17 myń oryn jetispeıdi. Sondyqtan, bir aıdyń ishinde bári sheshile salmaıdy. Bári josparǵa saı júrýi tıis. Bári adamǵa baılanysty emes, shynaıy jaǵdaılar bar. Elordaǵa adamdar kóptep kóshýde. Mıgratsııalyq jáne demografııalyq saldo oń nátıjeni kórsetip otyr. Qazirdiń ózinde elordada 1,1 mln adam turady. Qala halqy tez ósip keledi», - dedi Kólginov.
