17 myń qazaqstandyq qarjy pıramıdalaryna 30 mlrd teńgeden astam qarjy salǵan
AQTÓBE. QazAqparat – Aqtóbede qarjy pıramıdasyna qatysty tergeý aıaqtalyp, 56 kúdikti anyqtaldy, dep habarlaıdy QazAqparat tilshisi.
«Garant 24 Lombard», «Estate Lombard», «Vygodnyı zaım» basshylaryna qatysty tergeý aıaqtaldy. Qazirgi kezde kúdiktiler men jábirlenýshilerdi qylmystyq ispen tanystyrý protsesi júrip jatyr. Keıin is sotqa joldanady. Tergeý barysynda 17 myńnan astam jábirlenýshi anyqtaldy. Onyń 3 myńnan astamy aqtóbelik. Bul adamdar 30 mıllıard teńgeden astam qarjy salǵan. Tergeý barysynda 56 kúdikti anyqtaldy. Onyń altaýy halyqaralyq izdeýde júr. Qalǵan 50 adamnyń 33-i ýaqytsha ustaý ızolıatorynda otyr. Beseýi úıqamaqta, qalǵan 12 kúdikti eshqaıda ketpeý týraly qolhatpen jiberildi. Tergeý barysynda birneshe sot-medıtsınalyq saraptama taǵaıyndaldy. Kúdiktilerdiń qylmystyq jolmen satyp alǵan múlki anyqtalyp, bárine tyıym salyndy», - dedi QR ІІM Tergeý departamentiniń asa mańyzdy ister jónindegi aǵa tergeýshisi Janbolat Abdraemov.
Aıta keteıik, uıymdastyrýshylardyń bári Aqtóbe oblysynyń turǵyndary bolyp shyqty. Qazir bári óńirdegi ýaqytsha tergeý ızolıatorynda otyr. Sot otyrysy da Aqtóbe qalasynda bolady.
«Keıin basqa qalalardan fılıal ashyp, ózge adamdardy qylmysqa tartqan. Sol sebepten Qylmystyq kodekstiń «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» baby boıynsha is qozǵalǵan. Tárkilengen múlik quny 2 mıllıard teńgeden asady. Bul baǵyttaǵy jumys jalǵasady», - dedi Janbolat Abdraemov.
