17 mlrd teńge kólemindegi zań buzý: Týrızm jáne sport mınıstrligi túsinikteme berdi
ASTANA. KAZINFORM – Týrızm jáne sport mınıstrligi Joǵary aýdıtorlyq palata júrgizgen tekseris qorytyndylaryna baılanysty vedomstvoǵa qarasty uıymdardyń qyzmetindegi anyqtalǵan zań buzý jóninde túsinikteme berdi, dep habarlaıdy Kazinform agenttiginiń tilshisi.
Eske salaıyq, buǵan deıin Joǵary aýdıtorlyq palata sportshylardy tárbıeleý men daıarlaýǵa bólingen bıýdjet qarajatynyń paıdalanylý tıimdiligine qatysty memlekettik aýdıt júrgizip, onyń nátıjelerin jarııalaǵan bolatyn.
Aýdıt qorytyndysy boıynsha jalpy somasy shamamen 17 mlrd teńge bolatyn buzýshylyqtar anyqtalǵan. Onyń ishinde:
Qarjylyq buzýshylyqtar — 348 mln teńge;
Tıimsiz josparlaý — 2,8 mlrd teńge;
Qarajatty tıimsiz paıdalaný — 13,7 mlrd teńge.
Týrızm jáne sport mınıstrligi Joǵary aýdıtorlyq palata aýdıti josparly túrde jáne tolyq ózara is-qımylmen júrgizilgenin málimdedi. Barlyq qajetti materıal ýaqtyly usynylǵan. Tekserý barysynda anyqtalǵan keıbir eskertýler joıylǵan.
— Aýdıt 2021 jylǵy qyrkúıekten 2024 jylǵy jeltoqsanǵa deıingi kezeńdi qamtydy. Jarııalanǵan derekter qazirgi ýaqytta qaralyp jatqan nemese iske asyp jatqan reformalarǵa baılanysty máselelerge qatysty, — dedi vedomstvonyń baspasóz hatshysy Balym Adamıdenova.
Onyń aıtýynsha, JAP kórsetken olqylyqtardyń basym bóligi mınıstrlikke qarasty bir uıymnyń qyzmetine baılanysty.
— Mundaı táýekelder boıynsha tergeý 2023 jyldan beri jalǵasyp keledi. Mınıstrlik quzyrly organdarmen ózara árekettesip jatyr, jáne tekserýlerdiń nátıjeleri boıynsha tolyq quqyqtyq baǵa beriledi, — dep habarlady baspasóz hatshysy.
Sonymen qatar, mınıstrlik esepte kórsetilgen zań buzýdyń jalpy salalyq deńgeıdegi josparlaý, baqylaý jáne shyǵyndardyń tıimdiligin baǵalaýdaǵy júıeli máselelermen baılanysty ekenin atap ótti.
— 2025 jylǵy 16 maýsymda qabyldanǵan «Dene shynyqtyrý jáne sport týraly» zańǵa engizilgen ózgerister mundaı táýekelderdi joıýǵa baǵyttalǵan. Budan bólek, JAP-pen birlesken is-sharalar jospary bekitildi. Ol basqarýshylyq jáne normatıvtik sharalardy qamtıdy, — dep tolyqtyrdy Balym Adamıdenova.